Arangkada of Leo Lastimosa for July 13, 2008

          MOKUMPISAL AKO

 

          May ikumpisal ko.  Gikuyawan kong nakig-atubang sa batan-ong mga pari sa Artsidyosesis sa Sugbo.  Ila kong gipasulti isip tsirman sa KBP Cebu Chapter sa ikaupat nga adlaw sa ilang usa ka semana nga tigom sa Talavera House of Prayer sa Recoletos Hills sa Quiot.  Wa kong kahibawo unsay ilang gustong madunggan.  Nahadlok kong mahugno lang sila bisan unsay akong isulti.  Kay unsa man tuod ang bag-o nakong matampo sa nilang nisagubang sa tahas pagtultol nato sa kinabuhing dayon?

          Gimubo nakong akong mensahe.  Aron nga kon taphaw ra ko alang nila, di sila mag-antos og dugay.  Ug kon makatsamba ko pagdani sa ilang pagtagad, may igo silang panahon pagpangutana.

-o0o-

          Nakaginhawa kog luag sa kamahigalaon sa ilang mga pangutana.  Nagkinto apan nahinangop kong nitubag nila.  Di tungod kay naikog ko nila.  Kon dili tungod kay mas nakumbinser ko nga way sukaranan nga mag-away ang mga pari ug mga sakop sa media.  Nga ang paghatag nilag higayon nga magkasulti ug ang pagbukas sa ilang panghunahuna makapugong sa pasanginlanay ug tinulisokay.

          Gibahin nakog tulo ang akong mensahe:  Una, ang kamanagsama sa mga papel nga gihuptan sa mga pari ug media isip tigsangyaw sa kasayuran ug dangpanan sa katawhan; ikaduha, ang di kalikayan nilang panagsungi tungod sa managlahi nga mga lagda sa media ug sa simbahan; ug ikatulo, ang mga gimbuhaton nga mahimo silang magkahiusa ug magtinabangay.

-o0o-

          May gikumpisal ko sa batan-ong mga pari:  Sukad sa gamay pa kong bata, ganahan kong mahimong katekista.  Apan tungod ba kaha kay wa gyod kong kataak og relihiyusong tulonghaan sa elementarya ug high school, wa matuman ang akong pangandoy.  Pagtungha nako sa kolehiyo sa USJ-R, nahimo kong aktibista, di katekista.

          Dihang nanimba mi sa akong asawa sa misa sa niaging Dominggo sa pagkabanhaw sa Our Lady of Fatima Parish sa Basak, Mandaue, nadani ko sa pahibawo nga may bansay-bansay alang sa mga katekista.  Apan ang mga petsa nga gitakda nadungan sa daghang mga gimbuhaton sa among sibyaanan.

-o0o-

          Mahimong di gyod ko ma-katekista.  Apan andam kong modawat og ubang gimbuhaton sa simbahan.  Ambot tungod ba kaha sa nagkataas nakong pangedaron, nakabatyag ko sa pangilaba sa akong kasingkasing pag-alagad sa simbahan.  Maong nangahas ko pag-awhag sa mga pari nga di sila angayng managana pagsangon sa mga sakop sa media sa mga tahas sa ilang parokya.

          Dayon nakong biya nila, gihatagan ko sa mga pari og matahom nga hulagway sa mahal nga Birhen.  Nga nitakdo sa lain nakong kumpisal nila nga sa gamay pa kong bata akoy nanabtan sa matag gabii nga pag-rosaryo sa among pamilya.  May gamay lang reklamo ang akong inahan.  Kay bisan sa kalinghod pa sa akong salabotan, ang Santos nga Rosaryo ako nang gi-adliban.  [30]  leo_lastimosa@abs-cbn.com