Arangkada of Leo Lastimosa for February 1, 2010

              Pilato si Gibo

 

       Wa kapugong ang Malakanyang pagdupa ni kanhi defense secretary Gilbert Teodoro.  Kinsa naapiki dihang nagdumili pagtubag kon iya bang gukdon si Pres. Arroyo, kon siya ang makabanos sa labing taas nga katungdanan sa nasud, atubangan sa mga pasangil sa kahiwian batok sa pamunoan.  Matod sa Malakanyang di angayng gawongan sa sunod nga presidente ang mga hukmanan.

       Nga nitakdo sa baruganan ni Teodoro.  Kinsa niinsistir sukad pa sa pagpahibawo sa iyang kandidatura pagka presidente nga di iyang gimbuhaton ang paggukod ni Arroyo.  O ni bisan kinsa nga gipasanginlan nga nanulis sa panudlanan sa katawhan.  Kay, nipasabot siya, iya ni sa mga hukmanan.

-o0o-

       Sayop si Teodoro ug ang Malakanyang.  Sama sa naandan.  Isip bar topnotcher, si Teodoro unta ang labing nahibawo nga ang mga hukmanan di mahimong maoy mopasiugda sa pagpanggukod nilang Arroyo ug sa ubang opisyal sa kagamhanan nga gipasanginlan og kahiwian.  Ang mga hukmanan di kalihok batok ni bisan kinsa—gawas lang kon may kaso nga ipasaka sa ilang sala.

       Nga maoy nag-unang gimbuhaton sa sunod nga presidente.  Kon tinuoray siyang nagtinguha pagpabarug og ligdong nga bag-ong pamunoan.  Di siya makapangugat nga mangampanya batok sa pangurakot apan mangiyugpos lang taliwa sa sibaw nga mga pasangil sa pangurakot—labi na kon ang hingtungdan maoy nakapatuboy niya sa Malakanyang.

-o0o-

       Utro sang palasyo.  Mao diay nga way dagko ug gamhanang alyado ni Arroyo nga nabilanggo.  Kay kutob ra diay sa yawyaw ang pasalig sa Malakanyang sa hiningusdan nga kampanya batok sa pagpangawkaw.  Kay niinsistir diay sa binuang nilang palusot nga ang mga hukmanan nay angayng manggukod sa mga badlungon.

       Apan nahibawo tang tanan nga di ni maoy nahitabo.  Gipuno ni Arroyo og iyang mga itoy ang mga hukmanan aron nga molingiw lang ang mga maghuhukom sa ilang mga pakauwaw.  Bisan ang Korte Suprema gustong hingpiton sa iyang mga tinudlo sa di pa mokanaog sa gahom.  Ang mga maghuhukom nga nipili pagbarug alang sa kaligdong, gibugalbugalan o gipanggukod gyod.

-o0o-

       Ang buhatan sa Ombudsman maoy nahimong simbolo sa kainutil sa kampanya batok sa mapahimuslanon nga mga opisyal sa pamunoang Arroyo.  Sukad sa paglingkod sa suod ni First Gentleman Mike Arroyo nga si Merceditas Gutierrez niadtong 2005, ang Ombudsman nikalit lang og katapolan ug kabanga.

       Gawas nga nitidlom pag-ayo ang gidaghanon sa mga kaso nga napasaka sa Sandiganbayan, kinabag-an sa mga kaso didto tugpa sa basurahan.  Maihap lang sa tudlo ang nakonbikto.  Ang uban boluntaryo pa gyong niangkon sa mga pasangil batok nila.  Ang mas masulub-on nga kamatuoran mao nga magpabilin si Gutierrez sa katungdanan bisan wa na si Arroyo sa gahom.  Mao diayng nangugat silang Teodoro ug Arroyo pagpasa sa responsibilidad sa mga hukmanan—kay itoy na mang Ombudsman, salig silang sipsip sang mga maghuhukom.  [30]  leo_lastimosa@abs-cbn.com

Arangkada of Leo Lastimosa for January 31, 2010

                   Lusot ni Lapus

 

          Inay moangkon og kabahin sa responsibilidad sa makauuwaw nga pagtidlom sa kalidad sa edukasyon sa atong nasud, si Education Secretary Jesli Lapus nidangop hinuon sa kinaham nga lusot sa mga politiko—ang lipatlipat:

·       Matod ni Lapus karaan na ang mga numero nga gigamit sa Unicef (United Nations Children's Fund) pagtandi sa kahimtang sa edukasyon karon sa Pilipinas ngadto sa mas kabos nga mga nasud sa Africa;

·       Mas daghan na ang mga bata sa Pilipinas ang nagtungha karon kay sa nangaging katuigan; ug

·       Mas daghan na ang babaye nga mga tinun-an nga nagtungha karon sa Pilipinas, lahi sa nangaging katuigan nga gamay ra kaayo kon itandi sa lalaki nga mga tinun-an.

-o0o-

          Wa gyod maghisgot si Lapus sa mas undanon nga mga bahin sa pagtuon sa Unicef nga nakaaghat ni UN Secretary General Ban Ki-moon pag-ingon nga nagpabaya ang mga opisyal sa Pilipinas maong nitibugsok ang kalidad sa edukasyon nga masaaron na unta kaayo pipila ka tuig ang nilabay.  Sama pananglit sa kagamitoy ra sa tinuig nga gahin alang sa edukasyon, nga wa ra gani sa kumingking sa atong silingang mga nasud sa habagatan-silangang Asya.

          Wa magtagad si Lapus pagpasabot nganong hangtod karon kuwangan ang classrooms, mga lingkoranan, mga libro ug, labaw sa tanan, mga magtutudlo.  Siyaro sa tanang pangangkon sa ekonomikanhong kalamboan sa Malakanyang, wa gyod silang kahunahuna pagpalambo sa gahin sa edukasyon?

-o0o-

          Ang kakabos sa kalidad sa edukasyon sa Pilipinas ikatandi lang sa kakabos sa suholan ug mga benepisyo sa mga magtutudlo.  Ang gilaslasan-nang-daan-ug-nalangay-pa-gyod pag-ayo nilang Christmas bonus mao lay labing uwahing bulilyaso.  Di pa gyod ang labing takos nga mga magtutudlo ang madawat.  Kay hangtod karon napakyas si Lapus ug ang iyang amo sa pagbadlong sa kurakot nga mga opisyal sa Departamento sa Edukasyon (DepEd) nga padayong nangilkil sa kabos nga mga aplikante.

          Maong wa gyoy makabasol sa labing takos ug labing ligdong natong mga magtutudlo nga manimpad na lang nga mamahimong domestic helpers sa Hong Kong ug sa mas kuyawng mga nasud sa Tungatungang Sidlakan.

-o0o-

          Siyaro way nakahunghong ni Lapus nga ang pagdaghan sa mga tinun-an sa Pilipinas wa magpasabot sa paglambo sa edukasyon.  Mahimong kasarangan lang nga sangpotanan sa pagtubo sa populasyon.  Ang pagdaghan sa babayeng mga tinun-an di makatabon sa kabos nga kahimtang sa mga tulonghaan.

          Di hinuon ta mahibung nganong tulibagbag ning dako si Lapus.  Ang iyang pagduma sa DepEd wa itumong pagpalambo sa edukasyon kon dili sa iyang politikanhong ambisyon.  Maong mas daghan siyag gipahimong billboards kay sa blackboards.  Salamat na lang nga sa surveys pa lang daan sa mga senatoriables, gibasura na siyang daan sa mabuot nga katawhan, labi na sa mga ginikanan nga nakasaksi sa iyang pakauwaw sa katungdanan.  [30]  leo_lastimosa@abs-cbn.com

Arangkada of Leo Lastimosa for January 30, 2010

              Text ug PCOS

 

       May sukaranan ang mga botante, nga wa pa sukad masukad makagamit og computers, nga mahadlok nga di magkadimao ang ilang pag-apil sa labing unang automated nga piniliay sa Mayo 10 karong tuiga.  Kon si kanhi senador Ralph Recto niangkon nga maglisod lang gihapon paggamit sa iyang cellphone bisan pila na ka tuig nga nagpuyo sa iyang bolsa, sila pa kaha nga way bisan gamayng alamag unsay kalainan sa desktop, laptop ug netbook?

Unsa man intawoy ilang dag-anan anang PCOS (precinct count optical scan) machines?  Ug di lang taga bukirang barangay ang nanagana.  Bisan ang taga dakbayan, labi nang mga hamtong ug labing kabos nga mga molupyo, kurog sab sa automation.

-o0o-

       Kahinumdom lang hinuon ko sa niaging Halad sa Kapamilya, ang dakong piyesta sa libreng mga pangalagad, nga gipahigayon sa main campus sa University of San Carlos (USC) niadtong Nobyembre sa niaging tuig.  Usa sa gitanyag nga pangalagad sa USC College of Engineering mao ang libreng basic computer skills training.

       Mga hamtong ang kasagarang nagtungkawo sa personal computers sa classroom.  Bisan sa kamapailubon sa mga magtutudlo ug mga tinun-an nga nagbalikbalik pagtudlo ug pagpasabot, naabtan ang pipila og tulo ka takna una nakamao pag-abli og accounts sa Yahoo, Gmail, Hotmail, Facebook ug Friendster.  Di gyod tinuod sayon ang unang engkuwentro sa bag-ong mga teknolohiya.

-o0o-

       Apan modason ko sa Comelec ug Smartmatic-TIM.  Sa ilang pagsalikway sa kahadlok sa mga botante nga komplikado ra kaayo alang nila ang automation.  Kay sa ilang pagpakita unsaon paggamit ang PCOS, way kulba alang sa mga botante, bisan sa labing burong.

       Kay, lahi sa cellphones, di sila motuslok og bisan usa ka button sa makina.  Lahi sa ATMs (automated teller machines) sa mga bangko, di sila pangayoan og PIN o ni account number.  Ang bugtong hi-tech nga butang nga ilang himuon mao ra ang paghungit sa balota ngadto sa nagnganga nga gamayng baba sa makina.

-o0o-

       Sayon ra sab ang pag-shade sa mga itlog (oval) sa tungod sa mga ngan nga napilian.  Bisan di mapuno og taptap sa pentel pen (nga giandam nang daan sa mga magtutudlo nga nagduma sa mga presinto), o bisan molapas og diyutay basta di lang moabot sa tapad nga itlog, maihap na sa makina.

       Nitumaw hinuon nga usa sa labing dakong kahasol sa mga eksperimento sa Comelec ug Smartmatic-TIM dinhi sa Sugbo ug ubang bahin sa nasud mao ang wa dayon pagdawat sa PCOS sa mga balota.  Sa PCOS nga akong naggamit, kaduha ko nisuway.  Sa pipila ka PCOS sa Metro Manila, kalima gyod.  Nalipay ta nga ang automation mao nay mopuli sa Comelec nga gipasanginlan nga di kamaong moihap.  Kakuyaw kon ang ipuli mga makina nga di kamaong mobasa.  [30]  leo_lastimosa@ans-cbn.com

Arangkada of Leo Lastimosa for January 29, 2010

              Bilib sa PCOS

 

       Tawga kong buta.  O taphaw.  O ilarunon.  O ulug-ulogan.  O tuo-tuohon.  O naghalhal.  O nagmika.  O nagdamgo.  O desperado lang nga magmatinud-anon na gyod ang umaabot nga lokal ug nasudnong piniliay sa Mayo 10 karong tuiga.

       Apan bilib ko sa PCOS (precinct count optical scan) machines nga maoy mobasa sa mga balota ug moihap sa atong mga boto sa giisip nga usa sa labing mahinungdanon nga piniliay sa atong panahon.  Bisan pa sa daghang mga pagsaway ug mas daghan nga mga panagana, salig ko sa katakos sa mga makina.  Pagpatigbabaw sa tinuorayng kabubut-on sa katawhan.  Nga gikahadlokan nga nalugpitan sa mano-mano nga mga piniliay sa niaging 103 na ka tuig.

-o0o-

       Gidad-an mi sa taga Smartmatic-TIM, ang kompaniya nga nakadaog sa subasta sa Comelec pagsuplay sa mga makina ug teknolohiya sa labing unang automated nga piniliay sa kasaysayan sa Pilipinas, og PCOS sa among sibyaanan gahapon.  Silang Gene Gregorio ug Miguel Avila ang niggiya namo unsaon pagbotar ubos sa bag-ong sistema.

       Duha ra ka gutlo ang akong gikinahanglan pagpili og presidente, bise presidente, 12 ka senador, party list group, kongresista, gobernador, bise gobernador, duha ka board members, mayor, bise mayor ug walo ka konsehal.  Ang PCOS wa ra abti og lima ka gutling (segundos) pagbasa sa akong balota ug tulo ka gutlo pagpatik sa ihap sa mga boto sa mga nanagan sa nagkalainlaing katungdanan.

-o0o-

       Bilib ko sa PCOS bisan sa napanid-an namo nga mosunod nga kakulian:

·        Giluwa sa makina ang balota sa una nakong paghungit, diha na dawata sa ikaduha nakong pagsuway;

·        Ang balota nga nalapsan sa tinta sa pentel pen kay naduot sa among kauban pagmarka ang mga itlog tungod sa mga ngan sa mga nanagan giluwa sab sa makina; ug

·        Kon masayop ang botante, di na niya makurhian ang sayop, di na sab siya hatagan og laing balota ug kon ilawog ang balota nga napatakaan og marka iluwa sab sa makina.

-o0o-

       Kinsa man tinuod ang di mobilib?  Labihang gamaya sa PCOS, mas dako lang og diyutay sa laptop, modawat lang sa mga balota nga gimarkahan alang sa nahimutangan nga presinto, moandar bisan brownout kay may baterya nga molungtad og 16 ka takna, ug makatino na kinsay nidaog sa lokal nga piniliay human sa duha ka takna ug sa nasudnong piniliay sud sa 36 ka takna.

       Apan ang PCOS di makabadlong sa terorismo.  O sa pagpamalit og boto.  Ang PCOS di makahulip sa makanunayon nga pagbantay ug pagpakabana sa mga botante.  Way mahimo kon magpabilin tang buta.  O taphaw.  O ilarunon.  O ulug-ulogan.  O tuo-tuohon.  O naghalhal.  O nagmika.  O nagdamgo.  O kutob ra sa pangindahay nga magmatinud-anon na gyod ang umaabot nga nasudnong piniliay.  [30]  leo_lastimosa@abs-cbn.com

Arangkada of Leo Lastimosa for January 27, 2010

              Tibi sa bata

 

       Mas dugay kong nakamata kay sa naandan.  Nakahukom kong di motrabaho.  O napugos ko sa akong asawa sa di pagtrabaho.  Salamat sa akong yayay.  Maoy akong natukmaan ang tulo ka gagmayng bata.  Pulos laki.  Morag managsuon.  Ilang gibali ang gagmayng mga punoan sa ipil-ipil ug gihapnig ang mga binali sa daplin sa dan. 

Kadaghan na kong kakita sa ilang mga ginikanan nga naghimo ini.  Kinawat-kawat kay gidid-an man sila sa mga guwardiya sa subdivision.  Kausa nga naagian nakong hamtong nga laki nga namutol og ipil-ipil ginamit ang sundang, nipasabot siya, "Para ni sa kanding."  Apan, tungod ba kaha kay mas gihigpitan nang seguridad, una ning higayon nga nakakita ko nga mga bata ray gisugo.    

-o0o-

       Dihang nakahimo na sila og duha ka di kaayo dagkong tapok, gisuwayan sa duha ka maguwang pag-alsa.  Nagbaguod sila.  Dihang napas-an na, di silang katarung og lakaw kay natabonan ang ilang mga mata.  Gibutang nila pagbalik sa yuta ang mga ipil-ipil ug gihatagan og gamayng bahin ang ilang kinagamyan.

       Naagian sila among silingang magtiayon nga matag buntag gyong mag-ehersisyo pinaagi sa paglakaw.  Gilabyan lang sila.  Dihang nakatarung na og panlakaw, nasugatan nila sa gamayng agianan sa kakugnan ang duha ka panday nga nagtrabaho sa among silingan.  Nanghunong ang mga panday ug gipauna pagpa-agi ang mga bata.  Pag-abot sa pikas dan, nanghunong ang mga bata.  Gidugangan ang karga sa kinagamyan.  Nga nagdagan-dagan ra ganina apan nitibi na.

-o0o-

       Ang talan-awon nakapahinumdom nako dihang naabtan ko og uwan samtang nagbaktas pauli sa among bay usa niana ka sayong gabii pila na ka semana ang nilabay.  Naabtan nako sa waiting shed sa eskina Hilltop ang batan-ong magtiayon uban ang tulo nila ka gagmayng bata.

       Dugay nituang ang uwan.  Nagdali sila kay ngitngit na ug wa pay tawo sa ilang bay sa bukid.  Dihang may nilabay nga habal-habal, nakahukom ang amahan nga manakay na lang sila.  Apan ang amahan ug duha ra ka bata ang nakasakay.  Ang drayber nagpatong na sa tangke sa gasolina.

-o0o-

       Nahibilin ang kamaguwangan uban sa inahan.  Nisamot kakusog ang uwan.  Pagkataudtaod, may babayeng nagpayong nga kaila sa inahan.  Nagkasabot silang may paliton samtang nagpaabot og kasakyan.  Nanaka sila sa skywalk apan gipasaligan ang bata nga balikon dayon.

       Gisundan sa bata pagtan-aw ang iyang inahan hangtod nga nakakanaog sa pikas nga bahin sa dan ug gilamoy na sa kangitngit.  Nasangit ang iyang panan-aw sa dakong hulagway sa skywalk—ang mapahiyumon kaayong si Mayor Avelino Gungob sa Consolacion.  Gilingi niya ang ngitngit nga dan padung sa ila.  Layo gyod tingali kay wa pa man mahibalik ang habal-habal.  Ambot unsay nasud sa linghod niyang pangisip—gitandi ba kahang kamalipayon ni Gungob ug ang kapait sa iyang kahimtang—ang bata nitibi.  [30]  leo_lastimosa@abs-cbn.com

Arangkada of Leo Lastimosa for January 26, 2010

                   Saag sa dengue

 

          Ang makalilisang nga pagsaka sa mga kaso sa dengue dinhi sa ato, labi na sa Dakbayan sa Sugbo, angayng tubagon sa lokal nga mga opisyal.  Wa mabadlong ang mga kaso sa dengue nga nisangpot sa wa kinahanglana nga kamatayon sa mga bata ug ubang inosente nga mga biktima kay nasaag ang kampanya sa lokal nga kagamhanan:

·        Padayon gihapon nila nga gidasig ang fogging operations, search and destroy operations ug ubang mga paukyab; ug

·        Gidasig ang mga ginikanan sa pagda dayon sa ilang mga bata nga panghilantan ngadto sa Cebu City Medical Center ug health centers.

-o0o-

          Natabonan sa naghinobrang pagarpar sa lokal nga mga opisyal ang labing yano, labing batakan, labing barato ug labing epektibo nga kampanya batok sa dengue:  Ang pagpanlimpiyo sa palibot.  Ambot nganong bisan unsa na lang paukyab ang ilang gidangpan, apan wa gyod sila makapasiugda og matinud-anon ug malahutayon nga kampanya sa pagpanilhig, paghipos sa mga basura ug pagkuha sa tanang posibleng puy-an sa mga lamok nga nagda sa makamatay nga sakit.

          Hinaot nga di ni tungod kay way multi-milyones pesos nga komisyon nga makuha gikan sa pagdasig sa mga molupyo sa tanang kabaranggayan nga maghiusa sa pagpanilhig.  Hinaot nga di ni tungod kay gamay ra kaayong komisyon kon mamalit og mga silhig kay sa mga kemikal nga maoy kinaham nilang himan sa paukyab.

-o0o-

          Ang fogging di lagi magsilbi.  Kapila na baya balikbalika sa Department of Health (DOH) nga kon igo lang tang mamomba og kemikal, sayon ra alang sa mga lamok ang pagbalhin sa laing dapit, nga makapalapad hinuon sa hulga sa dengue, ug mamalik ra gihapon sa gibiyaang mga dapit kon wa nay fogging.

          Mao sab ang pagpamutang og lana sa mga kanal ug ubang nagpundo nga tubig.  Gawas nga makaguba sa kalikopan, taphaw rang kapuslanan kay ang mga lamok daghan mang kabalhinan kon way tinuoray nga pagpanlimpiyo sa tibuok palibot.  Makaiibog hinuon kaayong komisyon gikan sa lana ug kemikal.

-o0o-

          Ang labing dakong kadaot sa pagpaugat sa lokal nga mga opisyal sa sayop nilang kampanya batok sa dengue mao kini:  Magsalig na lang hinuon ang mga molupyo nga masumpo nang dengue sa lana ug kemikal, mangiyugpos na lang atubangan sa paukyab sa mga politiko, ug mora rang naglawog sa ilang mga bata ngadto sa makamatay nga sakit.

          Kon may nahibilin pang kabuot ang lokal nga mga opisyal, ug kaluoy ngadto sa umaabot pang mga biktima, hinaot undangon nang ilang binuang.  Kon ipada ang tanang panghilantan ngadto sa CCMC ug mga sentro, wa nay laing mahimo ang mga mananambal.  Ug kon magpaabot pa tang dunay hilantan, tungod sa kabangis karon sa bag-ong mga matang sa kagaw sa dengue, mahimong uwahi nang tanan.  [30]  leo_lastimosa@abs-cbn.com

Arangkada of Leo Lastimosa for January 25, 2010

                   Us-os sa lana

 

          Ang maayong balita:  Nagsugod na pag-us-os ang presyo sa lana sa merkado sa kalibotan; ug segun sa mga eksperto sa industriya magpabilin nga ubos ang presyo sa lana tibuok tuig sa 2010.  Ang hinungdan?  Ang usbaw sa panginahanglan sa lana sa Tsina, India ug ubang nasud sa Asya, mapapas sa dakong pagtidlom sa konsumo sa Estados Unidos, kansang mga motorista padayong naggapos sa ekonomikanhong krisis.

          Ang di maayong balita:  Ang us-os sa presyo sa lana sa merkado sa kalibotan di mosangpot sa mas ubos nga presyo sa lana.  Ang hinungdan?  Segun sa samang mga eksperto, ang mga kompaniya sa lana mamawi sa alkanse sa ilang ginansiya sa niaging mga buwan.

-o0o-

          Sa ato pa, di tang kapaabot dinhi sa Pilipinas nga makatilaw sa pag-us-os sa presyo sa lana sa merkado sa kalibotan.  Sama sa naandan, maglaway lang ta bisan kon ang matag baril sa krudo tag-$78 na lang ug padayon pang nitidlom.  Kay atong mga kompaniya sa lana nabantog nga luya kaayo kon us-os na sa presyo ang hisgutan, sukwahi sa ilang kaabtik pagpausbaw dayon sa bisan unsang timaan sa pagsaka sa presyo sa merkado sa kalibotan.

          Ang bugtong konsuylo nato dinhi nga di na ta bunalan sa mga kompaniya sa lana og makalilisang nga usbaw sa presyo karong tuiga.  Ug hinaot nga di na sab ta lubat-lubatan sa dakong saka sa plitehan sa mga sakyanang pamasahero.

-o0o-

          Ato na lang edukahon ang atong kaugalingon mahitungod sa kahimtang sa industriya sa lana.  Mao ra ni atong bugtong dag-anan nga di na ta isud sa bolsa sa mga kompaniya sa lana.  Kay di na tang kapaabot sa kagamhanan nga manalipod sa atong mga interes.

          Naklaro na hain kapusta ang kagamhanan ni Pres. Arroyo.  Dihang gimandoan sa hukmanan pag-abli sa mga libro sa mga kompaniya sa lana, ang Malakanyang nidupa sa higanteng mga kompaniya sa lana.  Ug dihang nihulga ang Bureau of Customs pagpaningil sa dakong utang sa Pilipinas Shell, ang Malakanyang didto nangabogar sa pikas.

-o0o-

          Hinaot nga ang modaog pagka presidente karong Mayo motinuod gyod pagsubli sa oil deregulation law.  Ang balaod nga gitumong unta pagpalambo sa kumpetinsiya tali sa mga kompaniya sa lana nahimo na man hinuong kahimanan sa way kinutoban nga pagpaburot sa ilang ginansiya.

          Usa sa mga probisyon sa balaod nagdili sa mga kompaniya sa lana nga magsultianay mahitungod sa ilang presyo.  Nga klarong gilapas nila sukad pa niadto.  Di na magkinahanglan og imbestigasyon sa Kongreso pagmatuod sa ilang panagkonsabo.  Ang managsama nilang usbaw nga P1.25 matag litro, o us-os nga P0.25 matag litro, sa samang adlaw, magligas lang og pipila ka takna, maoy labing bantang nga ebidensiya.  Apan ang kagamhanan, nakatag-an mo, nipili sa paglingiw.  [30]  leo_lastimosa@abs-cbn.com

Arangkada of Leo Lastimosa for January 24, 2010

                        Cerge ug Mao

 

            Usa sa mga kawsa ni anhing Cerge Remonde isip magsisibya, kapid-an na ka katuigan ang nilabay, mao ang pagbatok sa komunismo.  Gawas sa iyang inadlaw nga mga komentaryo nga nagsaway sa ideyolohiya sa DYLA, nagtukod siya sa People's Alliance Against Communism (PAAC).  Nga nahimong labing aktibong kaabag sa militar ug kapolisan pagdaog pagbalik sa kasingkasing ug hunahuna sa katawhan nga nadani sa mga komunista.

            Bisan kaming batan-ong mga sakop sa "A Team" gipaapil sa kawsa.  Gipada ko niya sa mga lalawigan sa Mindanao nga gihugpaan sa mga rebelde aron modiskurso sa rallies batok komunismo.  Pipila sa among kaubanan naghupot og armas human pasidan-i nga mahimong ig-on mi sa Sparrow Units sa NPA.

-o0o-

            Kay aktibista man ko sa tinun-an pa sa USJ-R, kanunay ko niyang gisungog.  Gihulagway ko niya nga maoy labing takos nga makabutyag sa mga pangabuso ug pangilad sa mga rebeldeng komunista.  Giawhag pa gani ko niya pagtug-an sa among kaubanan sa mga linya sa propaganda sa mga komunista aron mahimoan og labing maayong tubag.

            Wa kong kabantay nga lain na og tinan-awan ang ubang mga aktibista.  Kay ang bisan unsang nihit nga mga takna nga nahibilin human sa among pagpanghipos og mga balita ug pagtunglo sa komunismo gigahin pagtudlo unsaon pagpanalipod ang among kaugalingon atubangan sa nag-usbaw nga pagpamatay sa mga anti-komunista.

-o0o-

            Hangtod nga nibiya ko sa DYLA ug nakakita na si Remonde og laing mga kawsa.  Dihang siya nay tagduma sa Presidential Management Staff (PMS), gisultihan ko niya nga inanay nang nausab ang iyang pagtan-aw sa ideyolohiya nga iyang gikasilagan.  Matod niya inanay na siyang niggakos sa mga panglantaw nga iyang gisalikway niadto.

            Maong wa ko mahibung nganong apil sa labing una nga nipadayag og kasubo sa kamatayon ni Remonde mao si Kongresista Satur Ocampo ug ubang kadagkoan sa walhong mga pundok.  Kinsa nihulagway nang Remonde nga, bisan sa daghan nilang nangagi nga mga panagsungi, usa ka matinud-anong alagad sa kagamhanan.

-o0o-

            Ambot nahibaw-an ba nilang Ocampo ug kaubanan nga usa sa nabantog nga paagi sa pakiggubat sa mga rebeldeng komunista maoy gigamit ni Remonde sa pagsakmit sa labing dako niyang kadaogan sa wa pa makalingkod sa Malakanyang—ang pagbungkag sa monopoliya sa higanteng networks sa kaulohan sa liderato sa Kapisanan ng mga Brodkaster ng Pilipinas (KBP).

            Mapailubon ang pakigbisog ni Remonde pag-angkon sa di-na-malabwang unom ka sunudsunod nga tuig isip nasudnong presidente sa KBP.  Nilibot siya sa nasud ug gikumbinser ang gagmayng networks nga angay silang maghiusa.  Si Remonde ang gituboy dihang nakaplagan sa promdi nga mga magsisibya ang ilang hiniusang tingog.  Way kalainan giunsa pagdaog ni Mao Tse Tung sa Tsina—nagbawudbawod nga paglihok sa kalungsoran paglibot ug pagsakmit sa dagkong dakbayan.  [30]  leo_lastimosa@abs-cbn.com

Arangkada of Leo Lastimosa for January 23, 2010

                        Maapsan pa ba?

 

            Ang labing makapaalarma alang sa mga kaatbang ni Senador Noynoy Aquino mao ang pagpabilin sa iyang rating sa 45%.  Bisan sa pagsulbong sa ratings ni Senador Manny Villar ug karong bag-o sa ratings ni kanhi presidente Joseph Estrada, wa maibani ang base ni Aquino.  Ang iya rang mga kaatbang maoy nagkinawatay apan wa gyod matandog ang iyang boto.

            Ang sunudsunod nga surveys nga gigastohan sa kampo ni Villar nagmatuod di lang sa kadako sa iyang puntil.  Kon dili sa iyang determinadong paningkamot pagpangita og paagi nga maapsan niya si Aquino.  Nakalipay ni Villa rang pag-us-os sa ratings ni Aquino gikan sa 65% niadtong Oktubre ngadto sa 51% sa Nobyembre hangtod sa 45% sa Disyembre.

                        -o0o-

            Sa labing menos tulo ka nasudnong surveys sa Disyembre, wa na mokanaog ang ratings ni Aquino.  Ang pagtidlom ini ngadto sa 44% sa usa ka survey gibasol sa margin of error nga 2%.  Ang kampo ni Villar mismo nangita na og laing mga tinubdan sa dugang mga boto.

            Di makadasig ang mga numero nga ilang nakit-an.  Sa survey sa SWS dayong tapos sa Disyembre sa niaging tuig, di motubo ang ratings ni Villar kon moatras sa iyang kandidatura si kanhi defense secretary Gilberto Teodoro.  Nakaplagan sab nila nga kon di mohinayon pagdagan si Estrada, ang masang mga botante mopaluyo ni Aquino, di ni Villar.

                        -o0o-

            Ang gilaoman sa kampo ni Villar mao nga ang surveys karong Enero mohatag og mas makapadasig nga hulagway.  Lima na ka buwan human sa kamatayon ni kanhi presidente Cory Aquino, busa di na ingon ana kalab-as ang kahinugon ug pagbangotan sa katawhan nga niisip ni Aquino nga labing mahinungdanong kabilin sa iyang mga ginikanan.

            May pasidaan hinuon si kanhi senador Ralph Recto sa iyang suod nga higala:  Inigsugod sa campaign period sunod buwan, di nang kapatuyang si Villar sa gidaghanon sa iyang TV ug radio ads; ug may kahigayonan na pag-apas silang Aquino ug ubang kandidato nga di sama kaadunahan og pundo.

                        -o0o-

            May sukaranan ang pangagpas nga kon magpabilin sa 45% ang ratings ni Aquino inig sugod na sa 90 ka adlaw nga campaign period, human na ang piniliay.  Mas taas pa ang iyang ratings kay sa kang Estrada niadtong kinapungkayan sa iyang popularidad sa 1998.

            Ang ka way makinarya ni Aquino nakapatumaw sa pagduda mahimo bang aktuwal nga mga boto ang pagpaluyo sa iyang mga dumadapig.  Wa say klarong makinarya si Estrada sa iyang pagdagan.  Apan ang kataas sa iyang ratings maoy nakapalisod sa bisan unsang pagsuway pagtikas sa piniliay.  Nga maoy pasidaan sa beteranong mayor sa Negros Oriental:  Mobotar ang katawhan ni Aquino bisan unsay sulti sa ilang gihangad nga mga mayor, mga kongresista ug mga gobernador.  [30]  leo_lastimosa@abs-cbn.com

Arangkada of Leo Lastimosa for January 22, 2010

                        Bayaning gitalikdan

 

            Kaluoy sa Pinay nga nagtrabaho isip tiglimpiyo sa usa ka klinika sa Saudi Arabia:  Gilugos sa iyang kauban sa trabaho, gibilanggo dihang nakaplagan nga nagsabak, nakuhaan sa iyang gisabak tungod sa pait nga kahimtang sa bilanggoan ug lapdosan pa gyod og 100 ka higayon kon makagawas na.

            Ang pait niyang kahimtang nahiagoman human nakalingkawas sa  nahauna nga kontrata sa panrabaho sa Dubai.  Diin gidaugdaog siya sa employer nga wa magtagad pagpakaon niya.  Gipakaingon niya nga makadawat og mas makiangayon nga pagtagad gikan sa bag-o niyang gitrabahoan sa silingang nasud sa Tungatungang Sidlakan.  Apan mas pait pa man diay hinuong kalbaryo ang nagpaabot niya.

                        -o0o-

            Tungod sa padayon niyang pagkabilanggo sa Saudi, ang OFW wa nay suholan.  Nga mao ray gisaligan sa tulo niya ka gagmayng mga bata nga nahibilin dinhi sa Pilipinas.  Nahunong sa pag-eskuyla ang duha sa tulo niya ka anak nga nagpangedaron og 15 ug 14.  Ang kamanghoran 5 anyos pa.

            Ang mga bata way kasayuran kanus-a makalingkawas ang ilang inahan gikan sa Saudi ug mahibalik sa Pilipinas.  Labaw na nga wa silay kasayuran unsay kaugmaon nga nagpaabot nila karon nga wa nay panginabuhi ang ilang inahan.  Ang kalinghod sa ilang panuigon wa makapanalipod nila gikan sa sangpotanan sa kapakyas sa kagamhanan pagmugna og tarung nga kahigayonan nga trabaho alang sa ilang inahan dinhi sa ilang kaugalingong nataran.

                        -o0o-

            Wa igkita sa bisan asang bahin sa panaugdaog nga nahiagoman sa OFW ang kagamhanan.  Way buhatan nga nakapugos sa unang employer sa Dubai paghatag sa tukma niyang suholan ug mga benepisyo, way buhatan nga nakahatag og kaisog sa OFW pagreklamo nga gilugos siya; way buhatan nga nakapasabot sa Saudi nga mas makiangayon ang pagsilot sa nanglugos kay sa biktima; ug way buhatan nga nakalukat niya gikan sa bilanggoan sa wa pa unta makuha ang iyang gisabak.

            Kini bisan kon ang OFW niagi sa tanang legal nga proseso sa POEA ug nakabayad sa OWWA.  Inutil ang POEA pagpatuman sa kontrata sa panrabaho.  Labawng way nahimo ang OWWA pagpanalipod sa labing batakan niyang katungod.

                        -o0o-

            Ang OFWs nakapada og hangtod $17 bilyones matag tuig.  Ang ilang dollar remittances maoy nakasagang sa labing bangis nga epekto sa kalibotanong krisis.  Mga ekonomista nagkauyon nga kon mohunong ang OFWs pagpada og dolyar sa ilang mga kapamilya, hingpit nga mahugno ang nasudnong ekonomiya.

            Tungod sa dako nilang tampo, gipasidunggan sa kagamhanan ang OFWs nga bag-ong mga bayani.  Kinasingkasing gyod tingali ang pag-ila kay wa man magtagad ang kagamhanan pagpanalipod sa OFWs gikan sa mga panamastamas sa langyawng kanasuran nga ilang gitrabahoan.  Matinud-anon gyod tingali ang pasidungog kay bisan ang Comelec nisalikway man sa pagsuway sa OFWs pagsalmot sa party-list elections, iyawat na lang unta nga may makada sa ilang tingog sa Kongreso.  [30]  leo_lastimosa@abs-cbn.com

Arangkada of Leo Lastimosa for January 19, 2010

                        14 ka leksiyon

            Mao ni ang mga leksiyon nga akong nakat-onan sa Sinulog 2010:

1.     Kon gusto kang sikit kaayong makasaksi sa contingents, mahimo gani kang mopataliwa sa mga mananayaw, o magyampungad bisan sa tiilan sa grand stage, mao ang pagpaka aron ingnon nga apil ka sa Sinulog Photo Contest;

2.     Labing sayon nga paagi paglusot sa bagang duot sa katawhan mao ang pagpaanod sa dakong panon nga naglihok sa samang direksiyon—itud ka gikan sa luyo ug mapugos pag-iway ang mga nagbabag sa unahan;

3.     Ang paagi nga nahisgutan sa ibabaw di magsilbi kon naghangad ang nag-una sa panon ug wa kabantay nga iron railing ang iyang girumbo;

            -o0o-

4.     Samtang huot kaayo ang kasagaran sa kadalanan, labihang hawana sa Sanciangko sa downtown ug Escario sa uptown;

5.     Hayahay agian ang South Coastal Road sa kasarangang mga adlaw, apan ayaw gyod pangahas og agi kon Piyesta Senyor kay mas kusog pa kon mokanaog sa sakyanan ug maglakaw;

6.     Managsama ang mga lingkoranan sa bleachers sa ruta sa grand parade ug sa Pilgrim Center—reserbado na alang sa mga sikit sa luwag ug di kapuslan sa kasarangang mga Sugbuanon;

7.     Labing epektibong paagi pag-iban sa kainit kon wa kay payong ni kawo mao ang pagtalikod sa adlaw;

            -o0o-

8.     Labing epektibong paagi paglikay sa uwan kon wa kay payong ni kapote mao ang pagkaratil og dagan paingon sa labing duol nga kapasilongan;

9.     Tinuod gyod diay nga way gidapigan ang Sinulog Foundation Inc., tsamba lang nga ang labing maayong contingents nakasayaw sa grand stage sa gabii na, kanus-a madan-agan na sila sa mabulukong mga suga ug mosidlak na pag-ayong bulok sa ilang props ug costume ug ritwal, labaw sa mga nag-unang mga mananayaw nga nipugos pagpahiyom bisan nagping-it sa naglingiting nga kainit sa adlaw;

10.                       Di kapasanginlan si Cebu City Vice Mayor Michael Rama nga nanghilabot sa pagtakda kanus-a makasayaw ang contingents kay labihan pang hayaga nga nakasayaw sa grand stage sa Lumad Basakanon nga gipangulohan sa iyang ig-agaw nga si Barangay Kapitan George Rama sa Basak San Nicolas;

            -o0o-

11.                       Dunay duha ka paagi paglusot sa pagdili ni Cebu City Mayor Tomas Osmena sa street parties human sa parada—kon ang bay patigayon gipanag-iya og dakong opisyal sa dakbayan, o kon di ka mananghid;

12.                       Kon gusto ka og libreng kaon ug inom, baktas lang sa ruta dayong human sa parada kay seguro gyong may mangagda nimo;

13.                       Ang dakong bahin sa New Imus Road labihang ngitngita nga di na luwas alang sa mga mananayaw ug mga manan-away inig tikyop sa kangitngit; ug

14.     Bisag unsaon, human sa pila ka tuig nga pagpaniid, mas maayo gyong mosayaw si Cebu City First Lady Margot Osmena kay ni Gobernador Gwen Garcia.  [30]  leo_lastimosa@abs-cbn.com

Arangkada of Leo Lastimosa for January 17, 2010

                   Duwa sa bata

 

          Ouano Wharf, Mandaue City—Ang fluvial procession gahapon maoy labing basa ug tugnaw sa 25 ka tuig nang pagpahigayon sa kalihokan matag bisperas sa Piyesta Senyor.  Human basola ang amihan nga maoy hinungdan sa way hunong nga uwan ug kusog nga huros sa hangin sa niaging mga adlaw, ang Pagasa may nakit-an nga low pressure area sa silangang bahin sa Dakbayan sa Hinatuan sa Surigao del Sur.

          Apan labihang linawa sa dagat.  Nga morang wa kahibawo nga angay unta siyang monunot sa kinaiyahan sa ibabaw.  Maong hapsay sa kinatibuk-an ang prosesyon sa dagat nga nibanhaw sa pagdunggo sa imahen ni Sr. Sto. Nino sa pantalan sa Dakbayan sa Sugbo 489 ka tuig na ang nilabay.

-o0o-

          Nipasidaan si Direktor Oscar Tabada sa Pagasa Mactan nga ang uwan ug hangin, kansang gikusgon nga 50 ngadto sa 70 ka kilometro matag takna ikatandi sa hinay nga bagyo, padayon nga mohasol sa mga Sugbuanon hangtod karong Lunes, liwas na sa Piyesta Senyor.

Kon pasikaran ang kabaga sa mga deboto gikan sa Sugbo ug sa ubang bahin sa nasud ug ubang kanasuran sa kalibotan—sa mga prosesyon gikan sa nasudnong shrine ni San Jose sa Mandaue ug sa palibot sa Basilica del Sto. Nino—gipamatud-an nila nga, sa makausa pa, bisan ang hulga sa panahon di makapawong sa ilang pagbalaan sa iyang kapiyestahan.

-o0o-

          Nagpasinguwan ang kasagaran sa mga bata nga nangabot dinhi.  Dihang akong gipangutana nganong wa sila magpandong, mora kong nakahimo og dakong sala.  Nakalimot ko nga ang pagpasinguwan mao diay usa sa labing kinaham nilang duwa.  Apil na sa balaang bata nga gihulagway sab nga sungogan ug laagan.

          Sama sa naandan, ang mga bata maoy niggiya sa mga dagko.  Dihang gitikyop ang mga payong, among nakaplagan nga di diay ingon ana kakusog ang uwan.  Usa sa mga deboto nga nagbitbit sa lima ka tuig niyang imahen nihatag og laing katin-awan:  "Bendisyon ning uwana kay naglinog man sa ubang bahin sa kalibotan."

-o0o-

          Nakatungtong ko dinhi sa labing unang higayon.  Ang unang 24 ka tuig nakong cover sa fluvial procession nipahimutang nako sa dagat sakay sa coastguard, o sa kahanginan sakay sa chopper, o sa announcer's booth sa mga tuig nga way lain nga gustong magpabilin.

          Napahigayon sa ABS-CBN Cebu ang labing unang live TV coverage sa fluvial procession.  Bisan wa palupara sa Air Transportation Office (ATO) ang among Sky Patrol tungod sa kangiob sa panahon.  Sugbuanong pamilya sa Estados Unidos nitug-an nako nga wa sila kapugong sa paghilak pagkakita sa imahen ni Sr. Sto. Nino ibabaw sa galleon nga niliyok sa kadagatan sa Mactan ug Mandaue.  Salamat sa footage nga ilang nakita sa live streaming sa stickam.com/dyab1512 uban ang tabang sa Smart Bro.  [30]  leo_lastimosa@abs-cbn.com

Arangkada of Leo Lastimosa for January 16, 2010

                        Sulog o sungog?

 

            Sinug.  Di Sinulog.  Mao ni ang tawag sa katiguwangan sa Sugbo sa sayaw alang ni Sr. Sto. Niño.  Gitawag nila og "Sinug" ang sayaw niadtong ang katuyoan lunlon pa nga pagbalaan sa milagrusong bata.  Matod nila nitumaw na lang ang ngan nga "Sinulog" dihang gisayaw na sa gawas sa Basilica del Sto. Niño alang sa kulturanhon ug ubang katuyoan.

            Si Dr. Jose "Sir Dodong" Gullas nipahinumdom sab nga "Sinug" ang tinuod nga ngan sa sayaw.  Apil mi sa iyang gipahinumdoman atol sa mga tigom nga iyang giduma paghingpit sa pagpangandam sa "Halad 2010," nga nilab-as sa mga awit ug kinaiyang Sugbuanon ug nipasidungog sa bantogang mga kompositor ug mag-awit, nga gihugopan sa mga Sugbuanon niadtong Miyerkules.

                        -o0o-

            Si Sir Dodong gidasonan sa mga katiguwangan sa Mabolo.  Nga maoy gipasidunggan nga nakasunod ug nakakat-on sa orihinal nga sayaw gikan sa ilang mga ginikanan ug nitudlo sa mga lakang ngadto sa sunod nga kaliwatan.  Si Estelita "Inday Titang" Diola, 80, tulo ka tuig pa lang dihang nisugod pagkuyog sa pundok sa iyang amahan nga si Buenaventura pagpangaliya ni Sr. Sto. Nino pinaagi sa sayaw.  Siyay giila nga labing suhito ug labing maayong magtutudlo sa tinuod nga "Sinug."

            Si Inday Titang nipuli pagpangu sa mga mananayaw dihang namatay ang iyang amahan.  Nahibung na lang si Inday Titang nganong nausab nang ngan sa sayaw.  Wa na siyang kamatikod kanus-a gisugdan paggamit ang "Sinulog."

                        -o0o-

            Ang mga tigpasiugda sa pagpalapad sa Sinulog 30 ka tuig nang nilabay nitudlo nato nga ang Sinulog gikan sa pung nga "sulog."  Ilang gihulagway ang sayaw nga susama sa sug o tapya sa tubig sa tampi sa sapa sa karaang Pahina.

            Apan si Inday Titang way nahinumdoman nga kalambigitan sa iyang gihigugma nga sayaw ngadto sa sug ni sa sapa.  Matod niya ang "Sinug" maoy sayaw nga pagsungog o paghagwa.  Nga gituohan sa iyang katiguwangan nga mao ang labing makadapit sa pagtagad ug masabtan sa milagrusong bata.

                        -o0o-

            Mahimong ang "Sinug" minubo lang sa "Sinulog."  Sama sa "dan" sa "dalan," "kayo" sa "kalayo" ug "bay" sa "balay."  Nga segun sa nangangkon nga mga eksperto sa atong dila maoy bunga sa tinapolan nga paglitok sa mga Sugbuanon.  Apan may lain pang mga pagtuo:  Nga ang "Sinulog" gikan sa pung nga "saulog;" o gikan sa dakong sunog sa Sugbo sa panahon ni Hari Tupas nga napakyas pag-ugdaw sa imahen ni Sr. Sto. Niño.

            Mahimo sab nga ang "Sinulog" maoy mas dali nga ibaligya ngadto sa higanteng mga kompaniya.  O mas haom nga isiyagit alang sa kiat-kiat ug patigayon sa ngan sa balaang bata.  Apan sakto silang Sir Dodong ug Inday Titang.  Di angayng usbon ang kasaysayan.  Kay pagbudhi na sa atong kagahapon.  [30]  leo_lastimosa@abs-cbn.com

Arangkada of Leo Lastimosa for January 14, 2010

                        Raket sa LTO

 

            Daghang salamat sa Korte Suprema.  Bisan 14 sa 15 nila ka mga sakop tinudlo ni Pres. Arroyo, gipamatud-an sa labawng hukmanan nga mahimo nilang ipatigbabaw ang balaod bisan batok sa mga interes sa pamunoan:

·        Gipugngan nilang pagpatuman sa RFID (radio frequency identification device) bisan nag-aliwaros nang mga itoy ni Arroyo pagdalidali pagpatuman sa P2.5 bilyones nga programa upat ka buwan sa di pang piniliay sa Mayo;

·        Gitugotan nilang makaapil sa piniliay ang Ladlad human gitunglo sa Comelec nga imoral ang katuyoan sa kahugpongan; ug

·        Gipatigbabaw nilang kadaogan ni Tining Martinez pagka kongresista sa ikaupat nga distrito sa Sugbo bisan mas sikit sa Malakanyang si Benhur Salimbangon.

                        -o0o-

            Mahimong di pa diay matapos ang kalibotan kon mopahuway na si Chief Justice Reynato Puno, ang bugtong nahibilin nga di pa tinudlo ni Arroyo (tinudlo siyang kanhi presidente Fidel Ramos), karong Mayo ug kon, suma sa gikahadlokan sa nagpakabana nga mga hut-ong sa katilingban, magpaugat si Pres. Arroyo pagtudlo og puli niya bisan ginapos pa sa pagdili sa pagtudlo og mga opisyal atol sa election period.

            Mahimo diay nga, samang Puno, nahuptan na pagbalik sa mga maghuhukom ang ilang kabuot ug kaligdong human sila natudlo ni Arroyo sa Korte Suprema.  Mahimo diay nga, samang Puno, makaangkon sila og kaisog pagbatok sa pinatuyangan nga pagpangyatak nilang Arroyo ug sa iyang mga alyado sa katungod sa katawhan.

                        -o0o-

            Ang RFID di mapatuman pinaagi lang sa stickers.  Nagkinahanglan ni og higanteng infrastractura.  Nga hangtod karon, bisan nagsugod nang Land Transportation Office (LTO) pagpangolekta og P350 sa matag nagparehistro nga sakyanan, wa pa matukod.  Wa pa gani hisguti.  Labaw nang wa ipasabot sa mga magbubuhis.

            Labaw nang way klaro kanus-a iuli ang nakolektang bayranan sa kadagkoan sa LTO.  Kinsa nagpapating sa awhag nga ibalik sa labing daling panahon ang bayad sa nabiktimang mga motorista.  Kon iiban sa umaabot nga mga bayranan sa mga tag-iya og sakyanan, mahimong abtan pa og tulo ka tuig.  Kon di maapsan sa kalimot.

                        -o0o-

            Kadudahan nang daan ang katakos ug kaandam sa LTO pagpatuman sa RFID, mas hanap pa gyod ang ugma ning labing bag-ong proyekto kon pasikaran ang gidangatan sa nag-una nilang mga pagsaway pagtarung sa industriya sa transportasyon:

·        Ang MVIS (motor vehicle inspection section), nga gitahasan pagsusi sa roadworthiness sa magpa-rehistrong mga sakyanan, napakyas pagbadlong sa kagang-kagang ug nagkawilkawil nang mga sakyanan nga padayong nagbahas-bahas sa kadalanan ug nakapa-peligro sa kinabuhi sa mga motorista ug mga pasahero;

·        Ang smoke emission testing centers napakyas pagpahunong sa mga sakyanan nga padayong nagbugwak og usa ka toneladang itom nga abo nga nakahilo sa tanang nagginhawa; ug

Ang drug testing centers nisugot lang nga hatagan og tubig nga de kolor sa mat-an nga mga drayber nga nagpa-renew sa ilang lisensiya.  [30]  leo_lastimosa@abs-cbn.com

Arangkada of Leo Lastimosa for January 13, 2010

                 Noynoy v. Villar

 

          Si Senador Manny Villar di mangayo og pasaylo nga bilyonaryo siya.  Ug nga dako na siyag gasto sa iyang advertisements sa radyo ug telebisyon.  Nisaad si Villar nga di gamiton ang Malakanyang pagbawi sa iyang gasto.  Gani, ang iyang gasto maoy gihimong panagang sa pasangil nga itoy siya ni Pres. Arroyo.

          Matod ni Villar di siya magawongan ni Arroyo.  O ni bisan kinsa.  Kay way nautangan sa gasto sa dugay rang nakabuylo niyang kampanya.  Matod ni Villar gikan sa iyang bolsa ang matag peso sa iyang dakong gasto.  Kadaghan gyod diay niyag kuwarta.  Apan nganong ang ikog sa iyang ads nagkanayon man, "This ad is paid for by friends of Manny Villar"?

                   -o0o-

          Gitataw ni Villar nga, lahi ni Senador Noynoy Aquino nga wa pay ikapakita sa iyang gipasalig nga dakong kausaban sa nasud ug sa kagamhanan, kadaghan na niya napamatud-an nga di siya managana ni motalaw pagbarug batok sa iyang gituohan nga makadaot sa nasud ug sa katawhan:

·      Isip house speaker, iyang gi-impeach si kanhi presidente Joseph Estrada nga labihan pa ka-popular ug ka-gamhanan niadtong 2000;

·      Sakop sa iyang gibanhaw nga Nacionalista Party, si Kongresista Gilbert Remulla, maoy nangu sa imbestigasyon sa House sa Hello Garci scandal nilang Pres. Arroyo ug kanhi Comelec commissioner Virgilio Garcillano; ug

·      Laing haligi sa Nacionalista Party, si Senador Alan Peter Cayetano ang nangu sa imbestigasyon sa Senado sa NBN-ZTE scandal sa wa pa kudetaha ang iyang liderato sa Senado.

                   -o0o-

         Pipila sa mga bagahe nga sagubangon ni Aquino sa iyang pagkuwestiyon sa kaligdong sa iyang mga kaatbang mao ang ka-wa niyay ikapakita gawas sa pagpangangkon nga wa siya mangawat.  Nga morang sablig sa lab-as nga tubag atubangan sa nangalisbo nga mga transaksiyon nga gisudlan sa mga nagtungkawo sa gahom.  Apan sa pagdis-og sa kampanya inanay nga nilampos ang iyang mga kaatbang pagpugas og pagduda nga di paigo ang wa niya pagpangawat kon wa say ikapakita unsay iyang nabuhat.

        Kay sa kinatibuk-an niyang paglingkod sa Kongreso, ambot tungod ba kaha sa kakuwang niya og politikanhong ambisyon, o di lang gyod ganahan nga mosalida, o di lang sab gyod ingon ana kakugihan ug ka-determinado pagduso sa iyang mga kawsa, wa gyoy nakadungog niya.

                    -o0o-

        Apan labihan na gyod tingaling purdoya sa moralidad sa atong politika nga dihang nipahibawo si Noynoy sa iyang kandidatura, giisip sa kinabag-an sa katawhan nga igo na nga wa siya magpakauwaw sa iyang pangatungdanan ug sa talagsaong kabilin sa pangalagad sa iyang mga ginikanan.  Tungod sa kahugaw sa uban nga mga nagpapili, igo na nga wa magpalamoy si Noynoy sa lang-og, bahala na kon wa say ikapanghambog nga mga nahimo.

        Mas dako ang bagahe ni Villar.  Ang wa pag-atubang sa mga pasangil sa kahiwian sa "C-5 at tiyaga" makapaturok sa kahadlok nga wa siyay kalainan.  Sa gikasaligan nga mantaga nga buot niyang pulihan.  [30]  leo_lastimosa@abs-cbn.com