Arangkada for June 30, 2007

          PAUGAT SA KAPITOLYO
 

 

        Di na mosalir ang kampanya sa lipatlipat sa Kapitolyo.    Nabayran o wa ang WT Construction sa ilang gipaningil nga P261 milyones sa pagtukod sa Cebu International Convention Center (CICC), di na malimod ni Gobernador Gwen Garcia ang pait nga kamatuoran nga moburot nang gasto ngadto sa kapin sa P800 milyones.   Ug di na katabonan sa iyang mga turutot ang mas makahasol nga kamatuoran nga sayop ang pangugat ni Garcia niadtong Mayo nga P581 milyones ray kinatibuk-ang naggasto sa CICC.

        Gawas lang kon ilang pasanginlan ang WT nga mangingilad ug bakakon.   Makaipsot lang si Garcia sa makauuwaw nga pagkabitik sa iyang nangalisbong kasaypanan (tinuyo man o dili) kon tulisukon niya si Willy Ty nga nagbuutbuot sa iyang gipangayo nga dugang bayad.   Apan di mahitabong magpatara ug mangiyugpos lang si Ty hangtod sa hangtod kay upat na ka buwan nga giyak-an ni Garcia ang iyang billing nga gisumiter niadto pang Pebrero.

-o0o-

        Di gyod diay maayong magpalabilabi og sulti.  Gawas sa panghambog ni Garcia nga mahimo silang makiha og "underpricing" tungod sa "kabarato" sa CICC, mas lisod bakwion ang iyang panganti nga di niya tugotan nga moabot ang gasto sa CICC sa makalilisang ("horrendous) nga gidak-on.   Nipasidaan pa si Garcia nga siyay unang moprotesta ug kusganong mobabag kon moabot ang gasto og P800 milyones.

        Protestahan ba ni Garcia ang pagburot pag-ayo sa gasto sa CICC ngadto sa P841 milyones?   Kusganon ba niyang babagan ang paggahin sa iyang lunod-patay nga mga alalay sa Cebu Provincial Board og dugang kuwarta aron pag-apas sa sa way kinutobang pag-inat-inat sa iyang gasto?   O modangop na sab sa pag-insulto sa iyang mga kaatbang, pagkiha sa mga nangahas pagbarug batok niya, pagpangita og laing kontrobersiya nga kahilabtan, paghakgom og laing lapok nga malabay, ug pagpanggukod ug paglisudlisod sa wa magustohing mga kawani sa Kapitolyo aron pagtabon sa iyang pagpanlipaghong?

                    -o0o-

          Samtang wa pa kapamatud-i ang mga pasangil sa kahiwian sa pagtukod sa CICC, sama sa pagpaburot sa presyo, paglaktaw sa subasta ug pagbuakbuak sa mga kontrata aron paglusot sa mga lagda, ang labing nangalisbong eskandalo mao ang kapakyas ni Garcia hangtod karon, unom na ka buwan human napabarug ang CICC, paghatag og matinud-anong subay sa kinatibuk-ang gasto sa labing dakong proyekto nga napatuman sa niaging 12th Asean Summit.  Ug si Garcia way kukaikog nga nagpabungulbungol sa sibaw na kaayong awhag nga, sa ngan sa tanang santos sa kalangitan, ipakita na palihug ang mga dokumento sa iyang kinaham nga transaksiyon.

          Nagtuo ba diay siya nga human napahilom ang Visayas Ombudsman tungod sa ilang paggukod ni Acting Deputy Ombudsman Virginia Palanca-Santiago, magpuyo ug motak-om na lang sang Sugbuanong mga magbubuhis nga maoy tinuod nga mga tag-iya sa dakong kuwarta nga way pupanagana niyang gigasto?  [30]  leo_lastimosa@abs-cbn.com

Arangkada for June 29, 2007

        SI DOLING KAWATAN

 

        Si Doling lab-asera.  Kansang kinabuhi kalit lang nausab.   Kalit lang nidako ang iyang bay.  Kalit lang nidaghan ang iyang mga sakyanan.  Kalit lang nanguhong ang iyang kabtangan.   Kalit lang nilapad ang iyang mga patigayon.  Sa laktod, mora siyang nakadaog og lotto.

        Nga maoy iyang gisulti sa nanguryusong mga silingan.   Apan way nituo niya.  Way gidungog nga nakadaog og lotto sa ilang dapit.  Bisan ang labing ungo sa sugal wa kapanimaho nga may silingan silang nakatsamba, o bisan nakapingis na lang og pila ka digits.

        Maong si Doling gihabolan sa sibaw nga mga pagduda.   Diin man gyod gikan ang dako niyang kuwarta?

-o0o-

        Tungod sa iyang katigayonan, si Doling sayon rang nakadaog pagka barangay kapitan.   Bisan giprotestahang iyang kadaogan, way nakapugong sa iyang paglingkod sa katungdanan.  Nga maoy nakapatumaw sa tinuod niyang batasan.

        Daan nang gikaintapan ang iyang kayawyawan sa lab-asera pa.   Apan way nakapangandam sa kapintas niyang mamanghag dihang nakatumpi nag kuwarta.  Labaw nang way nakahibawo unsaon pagsagang ang binaboy niyang kasaba, nga di makaon bisan sa irong buang, dihang nakahupot na og gahom sa politika.

        Maong dihang nipasumbingay ang usa niya ka silingan nga kinawat ang iyang katigayonan, morang kilat sa udtong tutok ang kabangis sa pag-ulbo ni Doling.

-o0o-

        Gikunis-kunis dayon niya ang nangahas sa pagpadayag og pagduda sa iyang kaligdong:   Ginganlan niya og mga ngan, sa makantalitahong mga pung gipakauwawan, gipalihok ang tanang mga turutot aron mabuong ang kadungganan ug masuk-anong nipasaka pa gyod og kaso sa hukmanan.

        Ang iyang mga saop ug mga binatonan, nga maoy iyang gidudahang nanabi sa gipanghimaraot nga silingan, wa pasayloa sa iyang kabagis:   Gipanglungkab ang ilang personal nga kabtangan, gihulgang ipanglabay ngadto sa labing layo niyang mga baboyan ug gawas nga tangtangon sa trabaho bahala na kon ang ilang mga pamilya malunosan sa gutom taralon pa gyod sa hukmanan aron hingpit nga motagam.

-o0o-

        Ang nasugamak nga silingan nagkapuliki og panagang sa iyang pagpanggukod.   Inay pasidunggan sa iyang pagpangita sa kamatuoran, ang iyang pribadong mga negosyo giapil pag-utingkay kon duna bay bisan gamay na lang lama sa kahiwian.  Mas makaluluoy hinuon ang wa intawoy mga nahot niyang mga saop ug mga binatonan.

        Ang tibuok kasilinganan gibati og kalisang.  Nangahadlok bisan sa pagpalandong na lang sa kalbaryo nga ilang tugpahan kon simbako sila say maduhig sa iyang kalampingasan.  Maong bisan duna silay nahibaw-an ug bisan sa kamapalabilabihon na sa iyang binuhatan, tak-om nga nangiyugpos ang kadaghanan.

-o0o-

        Dihang natino nga nagkuray na sa kahadlok ang kinabag-an sa kasilinganan, nga wa nay mangisog pagtabang sa pipila nga nibarug nga iya nang napiangan, si Doling, sa labing mapahitas-ong tingog nga hinukad sa nagdagtom niyang galamhan, niangkon:

"Kawatan bitaw ko!  May mahimo diay mo?"   [30]  leo_lastimosa@abs-cbn.com

Arangkada for June 28, 2007

       SANTIAGO TAKTAKON?

 

       Nakadawat mi og makahasol nga kasayuran nga mahimong mahinayon ang gikahadlokan sa ligdong nga mga Sugbuanon:  Ang pagkatangtang ni Acting Visayas Ombudsman Virginia Palanca-Santiago gikan sa katungdanan.  Nakatag-an mo, tungod ni sa iyang pagpangahas pag-imbestigar sa mga pasangil sa overpricing ug pagpanglaktod sa pagtukod sa Cebu International Convention Center (CICC).

        Gamhanang politiko sa Sugbo, nga wa malingaw sa kaligdong ug kaisog ni Santiago, gikatahong nirekomendar na ngadtong Pres. Arroyo sa pagtudlo og bag-ong deputy Ombudsman alang sa Kabisay-an puli sa niretiro na nga si Primo Miro.  Nga di lisod nga palutson sa Malakanyang kay si Santiago wa pa man matudlo sa katungdanan nga kasamtangan lang niyang gihuptan.  Gani, usa ra man siya sa daghang mga aplikante sa katungdanan nga mohabol unta niya og lig-on nga panagang batok sa politikanhong mga pagpanggukod.  Kay di na man siyang kapasakaan og kaso ug matangtang lang pinaagi sa impeachment.

-o0o-

        Mao ba ni hinungdan nga nikalit lang og kaungot ug kamingaw ang imbestigasyon sa Visayas Ombudsman sa kontrobersiya sa CICC?  Nga kon unsa kapaspas ang ilang pagsusi, pagpugong sa kuwarta ug pagsuspenso sa nahilambigit nga mga opisyal sa nahaunang mga eskandalo sa surveillance cameras ug decorative lampposts sa 12^th Asean Summit, mao sab kaluya, mas hinay pa gani sa umang, ang irog sa ilang pakisusi sa makalilisang nga gasto ni Gobernador Gwen Garcia sa iyang gipamugos nga labing dakong proyekto sa summit.

        Nadutlan ba gyod diay si Santiago sa pagpanghasi ni Garcia niya ug sa iyang mga sakop, pinaagi sa pag-awhag nga suspensuhon siya sa katungdanan, ilisan og bag-ong imbestigador ug pasakaan pa gyod og mga kasong kriminal ug administratiba?  Kay mag-unsa man tinuod ang katakos ug determinasyon nilang Santiago pagtuman sa ilang mga gimbuhaton kon nakakita na og mga tilimad-on nga ang ilang kadagkoan, nga gipasanginlang pahoy ni First Gentleman Mike Arroyo, nga giingon sang maoy gisandigan ron sa mga Garcia, klarong tua na kapusta sa pikas?

-o0o-

        Atong atangan kon unsay himuon ni Pres. Arroyo.  Paminawon ba niya, sama sa naandan, ang mga naglibot niyang mga opisyal nga way laing gitinguha gawas sa pagpaburot sa ilang hinakog nga mga interes?  Ang pagtangtang niyang Santiago di lang makapilde sa imbestigasyon sa CICC kon dili makaduhig sab sa nakabuylo na untang pakisusi sa ubang nangalisbong mga eskandalo sa summit.

        O magsugod na pagtikad sa iyang kabilin karong tulo ka tuig na lay nahibilin sa iyang pamunoan?  Pinaagi sa pagmatuod nga pasagdan niya ang mga institusyon sama sa Ombudsman sa pagtuman sa ilang mga gimbuhaton, bahala na kon kinsay maig-an.  Bisan maapil pang mga politiko nga nagpatuong sikit sa luwag ug way kukaikog nga niuran-uran sa iyang ngan aron pagbaraw sa bisan unsang pagsuway paglili sa ilang kahiwian.  [30]  leo_lastimosa@abs-cbn.com

Arangkada for June 27, 2007

        CARLO v. JONAS?

 

        Nahadlok ko nga ang kaswal nga mga kawani sa Mandaue City Hall wa pa mahuwasi sa ilang pamaol tungod sa makabungog nilang pagpakpak ni Vice Mayor-elect Carlo Pontico Fortuna.   Kinsa maisugong nibarug pagpanalipod nila.  Gihangop nila pag-ayo ang pagsupak ni Fortuna sa gikatahong laraw ni Mayor-elect Jonas Cortes sa di na paglab-as sa ilang mga kontrata nga mapupos karong Hunyo 30, dungan sa pagkapupos sa termino sa suspendido pa hangtod karon nga si Mayor Teddy Ouano.

        Human sa iyang pasidaan nga, gawas nga makulban sa kaldero ang kaliboan ka mga sakop sa pamilya kansang inadlawng mga panginahanglan nagsalig sa suholan sa 2,000 ka kaswal nga mga kawani nga tangtangunon, mahimong masakripisyo ang batakan nga mga pangalagad sa City Hall ngadto sa mas daghang mga Mandauehanon, mahimo bang ipasabot ni Fortuna:

·         Nagdugo ba gyod ang iyang kasingkasing alang sa kabos nga mga kawani?; o

·         Igo lang nagtuman sa sugo sa iyang mga padrino sa politika?

-o0o-

        Kon si Fortuna makabuwag kadiyot sa alingugngog niyang mga dumadapig, hinaot nga makahinumdom nga suluguon siya sa tanang Mandauehanon ug di itoy sa pamilyang hingpit nang gipalagpot sa gahom.   Makahigayon sab unta siya pagpaminaw ni Atty. Magno Dionson, tsirman sa Bando Mandaue-Anak Bisaya nga nidagan sab pagka mayor niadtong Mayo 14, maayo sab tingaling iyang ipasabot nganong nagkatuiris ang ilang mga numero sa kaswal nga mga kawani sa Mandaue.   Ang 2,000 ka kaswal nga mga kawani nga gi-kampeyon ni Fortuna labihang dako og labaw kon itandi sa gidaghanon sa kaswal nga mga kawani nga giangkon ni kanhi mayor Ouano.

        Si Dionson nakapakita og suwat nga pinirmahan nila ni Ouano ug Mandaue City Human Resource Management Officer Janet Trinidad niadtong Marso 7 karong tuiga, nga nisukwahi sa sibaw nga mga pasangil sa pagpaburot sa burukrasya sa ilang way pus nga mga dumadapig ug nipahibawo nga wa rang kaabot og libo ang mga kawani sa City Hall (372 ra ang tukma nilang ihap):

·         488 ang mga kawani nga may plantilla positions; ug

·         282 ang kaswal nga mga kawani.

-o0o-

        Gipaburot ba diay ni Fortuna ang iyang mga numero aron lang paghimo sa iyang pasidaan nga mas kahadlokan?   O si Ouano maoy nisuway pagpahiyos sa gidaghanon sa iyang mga dumadapig nga gipahimutang sa City Hall aron lang pagpahilom sa pagsukitsukit ni Dionson?

        May sukaranan ang awhag nilang Dionson ug ubang nagpakabanang mga Mandauehanon ngadtong Fortuna sa pagpangayo og pasaylo sa iyang pagdupa sa gipasangil nga kahiwian sa pamunoang Ouano sa niaging siyam na ka tuig, inay nga magsugod na og supaksupak ni Cortes bisan wa pang kaasumir sa liderato sa dakbayan.

        Kon matinud-anon sa iyang pasalig pagtabang sa bag-ong mayor, di maayong magsugod si Fortuna pinaagi sa pagpanghudlat.   [30]  leo_lastimosa@abs-cbn.com

Arangkada for June 24, 2007

            IMBITASYON NI GWEN

 

            Gikang nitambong sa usa ka semana nga tigom nga gipatawag sa Regional Network Group (RNG) sa ABS-CBN Broadcasting Corporation sa kaulohan, ug human magkapuliki og panagang sa iyang pagpanggukod ug pagpanamastamas, nakugang ko pagkakita sa imbitasyon gikan sa Kapitolyo sa Sugbo alang sa pormal nga pagpanumpa sa katungdanan nilang Gobernador Gwen Garcia ug kaubanan.  Di ni unang higayon nga nakadawat ko og imbitasyon gikan sa Kapitolyo.  Bisan gikiha na kong Garcia og libelo sa Barili, gidapit gihapon ko niya sa iyang pagtuki sa kontrobersiyal nga gasto sa pagtukod sa Cebu International Convention Center (CICC) niadtong Mayo 3, nga samtang abunda sa pagarpar puwerteng nihita sa mga dokumento.   Lain hinuon ang iyang gipadad-an sa imbitasyon bisan nahibawo siya asa ang akong buhatan ug ang akong pinuy-anan.

Lahi sa mas mahigalaong mga pagdapit sa wa pa siyang kahunahuna pagkiha nako, wa nay sinuwat nga pirma ni Garcia ang imbitasyon nga akong nadawat sa niaging semana.  Apan naglibog ang akong kutaw nganong patambungon man ko nila sa ilang pagpanumpa?

-o0o-

Akong nahibaw-an nga manumpa sila karong Sabado, Hunyo 30, alas-tres sa hapon, o tulo ka takna human magsugod ang ilang lab-as nga termino sa udtong tutok sa samang adlaw.   Ambot unsay hubad ini sa mga abogado, apan nagpasabot ba ni nga mabakante ang katungdanan nilang Garcia ug kaubanan sud sa tulo ka oras—gikan sa alas-12 sa udto, kanus-a mapupos ang ilang karaang termino, hangtod nga manumpa sila sa ilang bag-ong termino sa alas-tres sa hapon?

O di na mahinungdanon kanus-a sila manumpa, basta nga nasublian si Garcia og laing tulo ka tuig ug busa angay na lang kong moduko sa kamatuoran nga siyay labing gamhanang politiko sa Sugbo sa pagmatuod sa iyang mga pasangil batok nako?   O binuang ang imbitasyon nga akong nadawat ug duna lay gustong mohasol nako pagpaadto sa Kapitolyo sa higayon nga wa nay laing nagtikaw-tikaw sa social hall?

Sabta lang ko palihug.  Di lang ko katuo nga human ko niya pasanginli nga iresponsableng maglilindog ug magsisibya, kalit nga nakaamgo si Garcia nga lehitimo diay kong sakop sa media nga angayng dapiton.   O tingali way pagtugot niya ang imbitasyon ug, inigkabasa niya ini, suguon si Byron nga sama sa naandan kandadohan ang Kapitolyo alang nako?

-o0o-

            Ang tinuod mao nga gisuwat ni nako aron pagsumbong nga di ko ganahang motambong.   Kuyawan ko nga ang gikaintapang kaisog sa gobernadora mapukaw kon makalingi siya nako ug maduhig lang hinuon ang kasolemne sa kalihokan.

            Maong mobalibad kong daan.   Ug di kahadlok sa gobernadora ang hinungdan.  Duha na ka semanang nagsugod ang klase apan wa pa kong kapakita sa akong mga tinun-an sa STC.  Di mahimong isnabon nako sila karong Sabado, sa ikatulong sunudsunod nga higayon.  [30]  leo_lastimosa@abs-cbn.com

Arangkada for June 23, 2007

        KUROG O SUKOL?

 

        Labing bag-ong ebidensiya nga nagmatuod nga ang atong sistema sa hustisya way kalainan sa bay sa lawalawa:   Ang langaw masangit; apan ang kabaw makalusot.

·         Ang mga kawani ug mga opisyal sa Kapitolyo sa Sugbo nga gipasanginlang nipagawas sa mga dokumento sa Cebu International Convention Center (CICC) pahamtangan na og bug-at nga mga silot, gawas nga ilabay sa mga dapit nga makapalayo nila sa ilang mga pamilya ug mahimong mas lisod sa ilang panarbaho, may pipila pa gyod nga makulban sa kaldero ug magutman ang mga pamilya kay suspensuhon nga way suholan sud sa pila ka buwan; apan sa pikas bahin

·         Si Gobernador Gwen Garcia, nga nagpabungul-bungol lang sa lehitimong mga awhag sud na ron sa unom ka buwan pagpakita sa mga dokumento sa makalilisang niyang gasto sa CICC, way nakaako sa pagsilot, bisan pitik na lang sa ilong.

-o0o-

        Nganong nahitabo man ning nangalisbong eskandalo sa Sugbo sa atong panahon nga mas gamhanan na unta ang demokratikanhong mga institusyon nga gitahasan pagpanalipod sa labing batakang tawhanong mga katungod bisan sa labing kabos ug huyang nga mga hut-ong sa katilingban?

·         Tungod ba kay gagmay ug manggiuwawon ra kaayong hingtungdang mga kawani nga di kamao unsaon pagpatawag og press conference, o bisan pagpadayag na lang sa pait nilang kahimtang ngadto sa mga sakop sa media, labaw nang way kuwarta ni koneksiyon sa pagpalaban sa mga abogado ug sa mga ahensiya sa kagamhanan kon mahimo ba lang lungkabon ug ukadyangon ang pribado nilang mga kabtangan ug mahimo ba lang diay silang iwiris-wiris nga bisan asang suok na lang sa Sugbo ipanglabay?; ug

·         Tungod ba kay nasuwawan ang tanang hingtungdan ni Gobernador Garcia nga way kukauwawng nipahamtang sa iyang kahawod pinaagi sa pagpalayas sa tanang gipasanginlang nakalapas sa mga lagda sa ilang pagpuyo sa mga luna sa lalawigan ug pagpakauwaw, paggukod ug pagkiha sa tanang nangahas pagsukwahi sa iyang kagustohan?

-o0o-

        Mokuray na ba lang sab ta sa kahadlok aron nga di maangin sa bangis nga pagpanghasi?   Mohilom na ba lang sab ta ug molingiw sa makit-an nga kahiwian aron nga di gukdon sa mga kukhan sa kagamhanan?  Mohunong na ba lang sa pagpakabana ug maneguro na lang sa pagpanikay-sikay sa mas luwas nga mga panginabuhi?

        O panahon nang mangisog, mobarug, motingog, mosupak, mosukol ug mohatag og kinutoban sa luod na kaayo nga salida sa mga opisyal nga nahubog sa gahom, nagsusapinday sa pagpagawal sa ilang bag-ong kahawod, ug nanghagit og buno ni bisan kinsang wa mopakpak sa ilang pakauwaw?

-o0o-

        Kausa, ang atong pangiyugpos nakapatumaw og dul-an sa duha ka dekada nga diktadura.   Apan ang atong paghiusa ug pagpanginlabot nakapukan sa higanteng mga kawatan ug nakapabanhaw sa demokrasya.

        Hangtod nga nagpabaya ta pag-usab…  [30]   leo_lastimosa@abs-cbn.com

Arangkada for June 18, 2007

       DI TA PALIPAT

 

       Daghan na siyang gikiha ug mas daghan na siyang giaway, apan si Gobernador Gwen Garcia padayong naglingug-lingog sa pagtubag sa makiangayong awhag sa Sugbuanong mga magbubuhis:  Mahimo bang mohatag na siya og matinud-anon ug dokumentado nga subay sa kinatibuk-an niyang gasto sa pagtukod sa Cebu International Convention Center (CICC)?

        Ang bugtong nahimo ni Garcia, nga klarong dinalidali niya nga tubag sa sibaw na kaayo nga awhag sa kuwentada dayong eleksiyon niadtong Mayo, mao ang upat ka oras nga way paniudtohay nga pagpabuhagay sa mga numero ug pangangkon nga nakadaginot pag-ayong Kapitolyo sa way pagtagad pagpakita og bisan usa na lang ka papel sa mga subasta sa mga transaksiyon nga iyang gisudlan, sa mga kontraktor nga iyang nabayran, ni sa materyales nga naggamit pagpabarug sa CICC.

-o0o-

        Nalukop na siyag panulisok sa iyang mga kaatbang o bisan sa mga nangahas lang pagsukwahi sa linya sa propaganda nga siyay bag-ong hawod sa Sugbo ug busa si bisan kinsang mosupak niya nagbudhi sa mga Sugbuanon.  Ginganlan niya silang buang, upaw ug way hibangkaagan, apan siya mismo wa pa kunsari sa tarung kabuot aron makaamgo nga iyang obligasyon—sa ato pa, wa siyay laing mahimo gawas sa pagtuman—paghatag og katin-awan sa gikuwestiyong mga transaksiyon nga iyang gisudlan.

        Nahubog na siya sa gahom.  Tungod sa tumang sarasay, wa na magtugkad ang iyang mga tiil sa yuta ug nakalimot na sa iyang tukmang luna sa kagamhanan.  Angay siyang siging-sigingon ug sabligan sa pahinumdom nga di niya saop ang mga Sugbuanon; hinunoa siya maoy ilang suluguon.  Ang mga Sugbuanon maoy iyang agawon—nga maoy nagbayad sa iyang suholan, nagplite sa tanan niyang biyahe, nagbaguod pagbayad sa tanan niyang gasto.  Ug busa, mahimo ba, sa ngan sa katarung ug kaangayan, hunungon nang luod nga salida nga morang siyay naghupot sa titulo sa tibuok Sugbo?

-o0o-

        Ang mga abogado ni Garcia nag-ulog-ulog niya nga di na siya madutlan sa mga kasong administratiba sa mga transaksiyon sa iyang unang termino tungod sa iyang pagdaog sa niaging eleksiyon.  Duna koy balita nila:  Ang posibleng pagkasuspenso ni Garcia maoy labing gamay nilang labad sa ulo; ang pagtubag sa mga kasong kriminal nga mahimong makapabalhog niya sa lang-og nga bilanggoan maoy angay nilang tukawan.

        Ang labing batakang mga pangutana sa CICC di nila mahimong lingiw-lingiwan hangtod sa hangtod:  Nganong wa may subasta ang pipila ka transaksiyon?; nganong gibuak-buak mang managsamang mga kontrata?; nganong wa man apilang P261 milyones nga gipaningil sa WT Construction tulo ka buwan sa wa pang taphawng kuwentada ni Garcia?

        Naglisod ba gyod si Garcia pagtubag ning mga pangutanaha?  Nga nalukop na siya pagpanghagad og bugno ni bisan kinsa aron lang di matuki ang iyang kapakyas paghatag og kuwentada sa kuwarta nga di iya?  [30]  leo_lastimosa@abs-cbn.com

Arangkada for June 17, 2007

       KABILIN NI CHOY     

 

       Pagkahibawo nako nga magsaulog si Choy Torralba, usa sa labing inilang komentarista sa Sugbo, sa ika-25 niyang tuig sa pagpanibya karong buwana, wa kong kapugong sa akong kaugalingon paghinumdom sa radyo sa Sugbo niadtong 1984, ang tuig sa pagsugod sa akong kinabuhi isip magsisibya.  Maguwang og duha ka tuig si Choy nako sa radyo, apan managsama ang mga kahimanan nga among gigamit.  Nga, kay pulos pa man mi aktibo sa radyo karon, makasulti sab si Choy ninyo nga lahi na kaayo sa kahimanan sa pagpanibya karon.

        Di kabayran og salapi ang kahinam sa labing una namong pagtingog sa radyo.  Niadtong higayona, ug tingali hangtod karon, daghan ang gustong mahimong magsisibya bisan way suhol; sa kaso sa blocktimers, mao pa gani mobayad aron lang makatingog.  Dunay mga kabilin nga di kahulipan bisan sa labing bag-ong mga teknolohiya.

-o0o-

        Labihang dagkoa sa tape recorders sa una.  Kausa, nag-cover mig transport strike nga nilungtad nag pila ka adlaw.  Nakighinabi mi ni anhing Ben Semilla sa Puvoc (Public Utility Vehicle Operators of Cebu), usa sa nangu sa welga, nga wa kakita sa iyang nawong kay natabonan sa higanteng cassette recorder ni anhing Roger Solante.

        Mas dagko ang recorders nga gigamit sa DYLA.  Napugos mig baswat sa Nagra human pahibaw-a nga magamit sa emergency broadcasts kon maguba sa bagyo ang among studio, gawas nga gigamit sa audio recordings sa shooting sa Hollywood.  Inig-abot namo sa press conferences nga magbaguod sa mas gamay apan bug-at sang Uher, moingon dayon si Noy Fred Espinoza, "Sugod na ta kay abot nang jukebox."

-o0o-

        Wa pay cable TV sa una.  Gawas sa pipila ka bay nga may satellite dish, ang kinabag-an sa mga Sugbuanon nga mahiligon sa NBA nagpanon sa kan-anan nga Boulevard duol sa Kapitolyo aron motan-aw sa duwa nilang Larry Bird sa Boston Celtics ug Magic Johnson sa Los Angeles Lakers.

        Ang tinubdan sa mga balita gikan sa ubang bahin sa nasud ug sa kalibotan mao ang saba kaayong telex machine sa Philippine News Agency (PNA) ug ang sagarak kaayong sibya sa BBC (British Broadcasting Corporation) ug VOA (Voice of America) sa shortwave radio.

-o0o-

        Karon duna nay MP3 recorders nga sama kanipis sa papel.  Makahimo ka na pagtan-aw sa balita sa CNN sa imong cell phone.  O magpaabot na lang bahaan sa mga balita nga mahipos sa news readers nga ihatod sa imong PC o PDA.

        Wa pay nahibawo unsay dagway sa pagpanibya kon modominar nang Internet, VoIP, podcasts, audio ug video streams, You Tube ug Wikipedia.  Apan wa tingali molalis nako nga ang niaging 25 anyos sa pagpanibya sa Sugbo nahimong mas buhi ug mas mabulukon tungod ni Choy.  Haligi sa industriya.  Tinuod nga higala.  [30]  leo_lastimosa@abs-cbn.com

Arangkada for June 15, 2007

        KUROG NI TRILLANES

 

        Usa sa nakahimong senador ni Antonio Trillanes IV mao ang kahiktin sa panglantaw ni Pres. Arroyo.   Hugot nilang gisupak ang mga petisyon ni Trillanes niadto nga makagawas gikan sa bilanggoan aron nga makakuyog sa iyang kaubanan sa Genuine Opposition (GO) pagpangampanya sa nagkalainlaing bahin sa nasud.   Nga lisod sabton tungod sa pagtugot nila nga makagawas silang kanhi senador Gringo Honasan ug kanhi MNLF Chairman Nur Misuari nga nag-atubang sab og susamang mga kaso.

        Gawas sa pagpagawas nila sa bilanggoan, ang nagbubalitok ug kadudahan nang baruganan nilang Honasan ug Misuari atol sa kampanya nakapalig-on sa pagduda nga gigamit sila sa administrasyon paglawgaw sa oposisyon sa piniliay niadtong Mayo 14.   Ang pagpabilin ni Trillanes sa bilanggoan nakapakumbinser sa kinabag-an sa mga botante nga mas matinud-anon siya kay sa duha ka gipaboran nga mga sinumbong.

-o0o-

        Nakatabang sab ni Trillanes ang pagpa-kyut-kyut sa iyang kaubanan sa GO sa dayong tapos sa campaign period.   Ang mga nag-una sa surveys sa SWS ug Pulse Asia nihunong na pag-atake ni Arroyo uban ang panghinaot nga mosamot pagburot ang ilang mga boto kon makuha ang pagpaluyo sa mga dumadapig sa administrasyon.   Apan si Trillanes hangtod sa kataposang gutlo sa iyang hinigpitan nga mga pamahayag gikan sa bilanggoan way lipud-lipod sa iyang panganti pagpalagpot ni Arroyo sa Malakanyang tungod sa lapad nga panikas ug pangurakot.

        Maong gikan sa iyang pagpangiwit sa unang mga adlaw sa kampanya, ug bisan sa kakabos sa iyang kampanya, nga giduma lang sa pipila niya ka mga kadugo ug mga higala nga way katakos sa paglibot sa tibuok nasud, si Trillanes inanay nga nikatkat paduol sa winning circle.   Maong ang iyang pag-okupar sa ikasiyam nga luna sa exit poll nga gihimo sa Pulse Asia alang sa ABS-CBN niadtong Mayo 14, samtang nakapakugang sa kadaghanan, gipaabot nang daan sa iyang kaubanan sa GO ug bisan sa mga tagduma sa Team Unity (TU).

-o0o-

        Iniglingkod ni Trillanes sa Senado sugod karong udtong tutok sa Hunyo 30, magsugod ang mas dakong labad sa ulo sa administrasyon.   Nga ilang kalikayan kon panaminan ang higante nilang kasaypanan sa niaging kampanya.  Kay kon padayunon pagtanggong si Trillanes, mamahimo siyang labing unang senador sa kasaysayan nga mag-alagad sa katawhan gikan sa bilanggoan:   Paggawason lang aron pagtambong sa mga sesyon sa Senado aron ibalik ra sab pagbalhog sa iyang selda diin, segun sa iyang abogado, di siyang kaligoy ug way laing mahimo gawas sa pagpanday sa iyang gisaad nga mga balaodnon pagsumpo sa pangurakot sa militar ug sa sibilyan nga kagamhanan.

        Apan kon di na babagan ang paglingkawas ni Trillanes, ug hatagan nag higayon nga gawasnong makatuman sa iyang mga gimbuhaton, may kahigayonan nga makita sa katawhan nga di siya sama kaligdong ni katakos sa didto pa sud sa bilanggoan.   [30]  leo_lastimosa@abs-cbn.com

Arangkada for June 14, 2007

        PAUGAT NI GLORIA

 

        Ang kapakyas sa Commission on Elections (Comelec) pagtiwas sa iskutenyo sa piniliay pagka senador usa na ka buwan human sa eleksiyon sa Mayo 14 nakapalig-on sa mga pagduda nga, sama sa naandan, napakyas na sab ang ahensiya pagpatigbabaw sa tinuorayng kabubut-on sa katawhan batok sa way kinutoban nga pagpanlubag ug pagpanikas sa mga nagtungkawo sa gahom.

        Abunda ang mga ebidensiya sa nangalisbong mga kahiwian sa piniliay:   Ang kapakyas pag-ilis ni Lintang Bedol ug ubang kadagkoan sa Comelec nga gilambigit sa Hello Garci scandal tulo ka tuig nang nilabay, ang pagpatay ug pagpanghasi sa mga nangisog pagbutyag sa lapad nga tikas ug ang sayon nga pagkahanaw sa nagkatuiris nga mga dokumento sa piniliay di na mahitabong tabonan sa mga pangangkon sa mga turutot sa Malakanyang nga napamatud-an sa piniliay ang kalig-on ug kaligdong sa atong sistema.

        Dakong balikas ang pangugat ni Pres. Arroyo nga ang mas lig-ong mayoriya sa oposisyon sa bag-ong Senado angayng makighiusa niya alang sa kalamboan sa nasud.   Siya maoy angayng moduko sa kabubut-on sa katawhan nga klaro nang nisalikway sa iyang liderato pinaagi sa pagbasura sa pahoy niyang mga kandidato.

-o0o-

Nakabuylo nang pangandam alang sa usa sa labing dako ug labing gikahinaman nga lumba sa dagan dinhi sa Sugbo, ang DYAB Kapamilya Run, nga ipahigayon karong Dominggo, Hunyo 17.   Gipaabot nga salmotan sa 1,000 ka runners, ang ikapitong hugna sa tinuig nga lumba magsugod ug matapos sa Sumilon Road sa Cebu Business Park ug molatas sa dagkong kadalanan sa Dakbayan sa Sugbo.   Usa ni sa highlights sa tibuok buwan nga pagsaulog sa ika-12 nga sumad sa pagkatukod sa DYAB Abante Bisaya.

        Dunay tulo ka kategoriya sa lumba nga maapilan:   10 kilometros (babaye, lalaki ug Executive Runners A ug B); 5 kilometros (babaye ug lalaki); ug 3 kilometros nga fun run.  Bugti sa P100 nga registration fee, ang runners makakuha na og singlets ug giveaways.

-o0o-

        Mahimong magpalista sa mosunod nga registration centers:   Ayala Turista Booth, Wow Travel & Tours sa E-Mall, ABS-CBN Broadcast Complex sa Jagobiao, Mandaue City ug Philippine Sports Commission sa Cebu City Sports Center.  Ang rehistrasyon pormal nga tapuson sa udtong tutok karong Sabado, Hunyo 16.   Ipanghatag ang singlets ug race packets sa tibuok hapon sa Sabado sa ABS-CBN Complex.

Gawas sa naandan nga cash prizes, trophies ug medals, duna say ipanghatag nga special awards alang sa biggest delegation, labing batan-ong runner, labing hamtong nga runner, tibuok pamilya nga managan, labing sayo nga naka-parehistro ug, kay Fathers Day man unyang Dominggo, amahan nga kinapaspasan nga modagan.

Si Cebu City Councilor Jack Jakosalem nipahibawo nga makadawat sab og mga medalya ni Pres. Arroyo ang unang duha ka finishers sa mga lalaki ug mga babaye sa 10K.   [30]  leo_lastimosa@abs-cbn.com

Arangkada for June 13, 2007

        DAOG APAN PILDE

 

        Ang alyansa nilang Gobernador Gwen Garcia sa Sugbo ug Barangay Kapitan Mary Ann delos Santos sa Lahug batok ni Cebu City Mayor Tomas Osmena tungod sa hulga pagkanselar sa proyekto pagtukod og bag-ong upat ka andana nga school building sa Lahug Elementary School nagmadaugon.   Ang pahibawo nga nagdugo ang ilang mga kasingkasing alang sa inosenteng mga tinun-an, kansang pagtungha gikahadlokang mahimong mas lisod kon mahinayon ang paghikaw sa dugang classrooms, nakadawat og lapad nga pagdayeg ug pagpaluyo sa nagkalainlaing hut-ong sa katilingban.

Ug tuod man, si Mayor Osmena, nga gikaintapan sa iyang katig-a, nikakak, nitalaw, niputi ang kiting, napugos pagbalitok sa iyang baruganan, nibakwi sa iyang deklarasyon sa gubat ug nisaad nga sugdan nang pagtukod sa school building sa mosunod nga mga adlaw.

-o0o-

        Apan ang kalit nga kausaban ni Mayor Osmena wa maggumikan sa kusi sa konsiyensiya.   Mas lisod tuohan nga gikunsaran ug gilamdagan siya sa Espiritu Santo.  Mahimong nagdugo og diyutay ang iyang kasingkasing alang sa mga bata (saligi si First Lady Margot Osmena sa pagsige og gahot niya).   Mahimo ganing nakaamgo na nga wa siyay dag-anan batok sa duha ka babaye nga nibarug alang sa linghod nga mga tinun-an.

        Ang gihimo sa mayor, samtang motumaw sa unang pagtan-aw nga timaan sa iyang tam-is nga pagtahan, maoy labing bangis nga bawos batok sa duha ka giisip niyang tigpaka-aron-ingnon.   Wa pa gani kahunahuna unsaon pagsaulog ang ilang kadaogan batok ni Osmena, silang Garcia ug delos Santos nakaamgo nga mora silang mga turista nga way laing kapaingnan human kalita sa pagbira ang ilang gitungtongan nga nagburut-burot ug gidudahan nga overpriced sab nga carpet sa CICC.

-o0o-

        May sukaranan ang pagkuwestiyon sa pagpakabana nilang Garcia ug delos alang sa mga bata:

·         Kinsay nakakita sa panginahanglan pagtukod sa school building aron nga di maghuot ang mga tinun-an?  Si Osmena ug mga opisyal sa dakbayan, di silang Garcia ug delos Santos; ug

·         Kinsay nigahin sa P15 milyones, nisubasta sa proyekto, ug nisud og kontrata pagtukod sa school building karong tuig tingtungha?   Si Osmena ug mga opisyal sa dakbayan, nga way bisan gamayng tampo nilang Garcia ug delos Santos.

-o0o-

        Inay mapahiyumon, ayaw kahibung kon silang Garcia ug delos Santos aslom og mga dagway nga morang nawad-an sa ilang kinaham nga duwaan.   Unsaon na man lang ron ni Garcia ang P5 milyones sa buhis sa mga Sugbuanon nga iyang giamot ug ang piso-piso nga natigom ni delos Santos?

        Hinaot nga si Garcia makamatngon nga mas nagkinahanglan og tabang ang mga eskuylahan sa lalawigan nga mas apiki kay sa Lahug.   Ug hinaot nga si delos Santos mahigmata nga ang kadaotan sa pagpanggukod ni Osmena way kalainan sa iyang pagbalibad sa pipila ka proyekto tungod lang kay gikan sa Cebu City Hall.   [30]  leo_lastimosa@abs-cbn.com

Arangkada for June 12, 2007

        KANG-A SA PANARBAHO

 

        Gilusad sa DYAB Abante Bisaya ang laing Kapamilya Relief Campaign, ning higayona alang sa 134 ka pamilya nga nagpuyo sa 70 ka naugdaw nga mga bay ang naigo sa dakong sunog sa Sitio Little Dalaguete, Barangay San Nicolas, Dakbayan sa Sugbo.   Si Barangay Kapitan Senon Bacus nipahibawo nga ang labing dinaliang hinabang sa mga biktima, nga ang kasagaran naggikan sa lungsod sa Dalaguete sa habagatang Sugbo, mao ang pagkaon, tubig, sinina, tambal ug mga gamit sa panimay.

        Sa makausa pa, mangahas na sab mi pagpanuktok sa inyong kasingkasing sa palihug paghatod sa mga hinabang nga bugas, sardines, noodles, used clothing ug ubang panginahanglan, apil nang mga gamit sa tulonghaan alang sa mga tinun-an nga wa kahipos sa ilang notebooks ug mga uniporme tungod sa kakalit sa kayo, sa ABS-CBN Regional Broadcast Complex sa Jagobiao, Mandaue City; o sa Barangay Hall sa Mabolo, Cebu City.

-o0o-

        Bisan sa pagbunok sa uwan sa Dakbayan sa Sugbo gahapon sa buntag, kaliboan ka mga aplikante ang nagpanon pag-apil Local ug Overseas Job Fair nga gipahigayon sa dakong wanang sa Bradford Church sa Osmena Blvd. sa bisperas sa ika-109 nga pagsaulog sa Adlaw sa Kaugalingnan.   Ang job fair nga gisalmotan sa 30 ka local employers ug langyawng placement agencies gipasiugdahan sa Southwestern University, Cebu City government, Department of Labor and Employment, DYAB Abante Bisaya ug ABS-CBN Cebu.

        Duna pay laing duha ka job fair nga umaabot karong buwana:

·         Ang Local Job Fair karong Hunyo 23 sa Abellana National School nga pasiugdahan sa Cebu Chamber of Commerce and Industry, Cebu City government, DYAB ug ABS-CBN Cebu; ug

·         Ang Local ug Overseas Job Fair karong Hunyo 30 nga idungan sa piyesta sa way kinutobang mga pangalagad (medical, dental ug legal mission, one-stop shop sa mga serbisyo sa nagkalainlaing ahensiya sa kagamhanan, livelihood skills training ug daghan pang uban) atol sa Halad sa Kapamilya sa DYAB Abante Bisaya sa Mabolo Elementary School.

-o0o-

        Nagpadayon ang paningkamot pagtapak sa nagkadakong kang-a tali sa mga kurso sa mga kolehiyo ug unibersidad ug aktuwal nga mga panginahanglan sa mga kompaniya sa Sugbo ug Central Visayas.   Subo nang daan nga daghang gradwado nga way trabaho.  Mas makapasubo, ug way lalis nga usa ni sa labing dakong anomaliya sa atong panahon, nga daghang bakanteng trabaho nga di kasudlan kay di tukma ang mga kurso nga ilang gihagoan ug gitukawan pagkuha.

        Si Fidel Magno sa Department of Manpower Development and Placement nihingusog sa job search ug employers forum aron magsayranay ang mga aplikante ug mga magpapatigayon sa ilang katakos ug panginahanglan.   Mas malungtarung sulbad ang pag-usab sa mga kurso aron nga di mausik ang salapi ug panahon sa mga tinun-an pagtapos sa mga kurso nga sa kapulihay di diay nila kapuslan.   [30]  leo_lastimosa@abs-cbn.com

Arangkada for June 11, 2007

       DAMGO SA KAUSABAN

 

       Kon kawani ka sa kagamhanan nga nakabantay sa pangabuso, panglaktod ug pangurakot sa imong kadagkoan, unsa may angay nimong buhaton?  Mangiyugpos lang ug molingiw sama sa naandan?  O magpakabana aron pagbaraw sa kahiwian?

        Kon magpakabana ka pinaagi sa pagbutyag sa pag-usik-usik ug pagbolsa sa buhis sa katawhan, apan inay pasidunggan sa imong pagbarug alang sa katarung ug kaligdong, gihasi, gigukod ug giapiki na hinuon, unsa may imong buhaton?  Mangiyugpos pagbalik ug sa makausa pa molingiw na sab, sama sa naandan?  O mangisog ug mosukol ug mosupak sa imong kadagkoan nga, sama sa naandan, wa managana paggamit sa ilang gahom batok nimo, sama sa ilang pagpahilom ug pagpatagam sa mga nag-una nimo?

-o0o-

        Ang pakigbisog batok sa kahiwian di sayon.  Kasagaran ikabangga nimo ang labing gamhanang mga sakop sa katilingban—ma-opisyal man sa kagamhanan o ma-dagko mang haligi sa katilingban—kay sa pagbarug batok sa pangabuso ug pagpahimus matumban man gyod nimo ang ilang dagkong kalyo.  Ug di hapuhap ray imong mapaabot gikan nila.

        Ila ang tanang kapilian paglisudlisod sa imong kinabuhi—mahimo ka nilang hayluon aron nga mohilom na lang, o hudlaton gyod kon magmagahi, o kulban sa kaldero kon mosukol gyod, o taralon sa hukmanan, o hatagan og kinutoban ang imong edad.  Tungod sa imong kaggamay, wa kay ikasarang pagbatok sa ilang panimawos.  Apan ang atong sistema sa hustisya maoy gitahasan aron makaangkon ka og makiangayong kahigayonan pagpanalipod sa imong kaugalingon, ug pagpatigbabaw sa katarung batok sa kadaotan.

-o0o-

        Ang nagkalainlaing mga institusyon nga gitahasan pagpatigbabaw sa kaangayan di sab hinuon hingpit nga gawasnon sa pagtuman sa ilang mga gimbuhaton.  Gamhanang mga politiko ug dagkong mga magpapatigayon maoy nagpahimutang sa mga polis, mga piskal, mga maghuhukom ug bisan sa mga tagduma sa independenteng mga ahensiya sama sa Ombudsman, Commission on Audit ug Civil Service Commission.

        Busa kon modangop ka ning maong mga institusyon, way garantiya nga kapanalipdan ang imong mga katungod ug nga mapatigbabaw ang makiangayon nimong kawsa.  Apan di ka pa hingpit nga mapukan.  Duna pay laing alas nga imong kapasilongan.

-o0o-

        Ang katawhan.  Sila ang labing gamhanan.  Gikan nila ang tanang gahom nga gipahimuslan sa labing dagkong mga opisyal sa kagamhanan.  Sila ang kataposang magbuot unsaon pagpatigbabaw ang labing dakong kaayuhan alang sa labing daghan.

        Apan ang kinabag-an sa katawhan mga kabos ug burong.  Samang gamhanang mga politiko ug dagkong mga magpapatigayon, nga maoy responsable sa pait nilang kahimtang, di motugot nga masakmit pagbalik ang gahom nga dugay na nilang gitahan.  Ang niaging piniliay, samtang dunay pipila ka tilimad-on sa kausaban, nimatuod sa makausa pa nanghawod lang gihapon ang mga kukhan.

        Ang maayong balita nga gitudlo sa atong kasaysayan:  Ang kinabag-an sa katawhan di hangtod sa hangtod nga mapig-otan.  [30]  leo_lastimosa@abs-cbn.com

Arangkada for June 9, 2007

        SENTENSIYA SA V-HIRE

 

        Di tinuod nga gi-sentensiyahan nag kamatayon ang mga V-hire (vehicles for hire).  Igo lang silang gipasidan-an nga ang ilang operasyon kutob kutob na lang karong 2013.  Sa ato pa, unom ka tuig na lang ang ilang lugway sa pagpamasahero sa kadalanan.

        Gitataw hinuon sa Land Transportation Franchising and Regulatory Board (LTFRB) nga mahimo pang V-hire nga mo-operate lapas sa 2013.  Apan kinahanglan silang mokuha og laing prangkisa sa Garage-Terminal (GT) Express.  Kansang mga kundisyon sama rang nag-awhag sa mga hingtungdan sa pagpangita na lang daan og bag-ong panginabuhi.

                -o0o-

        Ang V-hire drivers ug operators nga nanambong sa Kapamilya Media Forum sa SM City Entertainment Plaza nitataw nga mas sayo nga mamatay ang ilang panginabuhi kon ilang tumanon ang mosunod nga mga lagda sa LTFRB labot sa ilang pagpamasahero:

·         Di silang kapaningil og plitehan sa matag usa sa mga pasahero kay pakyaw ang ilang bayad, ipasikad sa matag biyahe ug sa gilay-on;

·         Di sila makapakanaog, ug labaw nang di makapasakay og mga pasahero, sa bisan asang bahin sa ilang ruta gawas lang sa gitakda nilang terminal ug destinasyon.

                -o0o-

        Ubos sa GT Express, makahimo na sila pagpangolekta og plitehan gikan sa mga pasahero apan gitakda sab nga tag-P2 ra matag kilometro sa matag pasahero.  Sa ato pa, sa unang lima ka kilometro, makakolekta silag P10, labaw sa P6 nga minimum nga plite sa PUJs.  Apan lahi sa PUJs, di gihapon silang kapasakay ni kapakanaog og pasahero gawas sa ilang garahe ug terminal.

        Matod sa V-hire drivers ug operators maalkanse gihapon sila kay wa man silay pasahero sa pabalik nga biyahe gikan sa ilang destinasyon padung sa terminal.  Maong nihangyo sila sa LTFRB ug sa nangreklamo nga drivers ug operators sa taxis. buses ug PUJs nga hatagan na lag kagawasan ang mga pasahero pagpili sa labing tukma nga sakyanan nga makahatod nila sa nagkalainlaing destinasyon.

                -o0o-

        Si LTFRB 7 OIC Reynaldo Elnar nitataw nga mahimong mausab pang mga lagda kon makumbinser ang ilang kadagkoan sa mga argumento pabor sa V-hire.  Si Cebu City Councilor Jack Jakosalem, tsirman sa transportation committee sa Cebu City Council, nitataw nga angay sang paminawon ang sentimento sa mga pasahero nga nakaphimus sa serbisyo sa V-hire.

        Sa iyang bahin, si Richard Cabucos, presidente sa Metro Cebu Taxi Operators Association (MCTOA), nireklamo nga kon di mabadlong ang kalapasan sa V-hire padayon gyong makan-ang ang mga pasahero sa taxis.  Samtang ang presidente sa Cebu Provincial Bus Operators Association, Nick Villahermosa, masaligon nga di kasustinir ang V-hire sa pagsubay sa ilang mga ruta ug pag-ilog sa mga pasahero sa ilang buses.

        Si Minda Ocliasa, usa sa mga pasahero nga nakapahimus sa serbisyo sa V-hire, nanghinaot nga mahusay ang panagsungi nga di masakripisyo ang interes sa mga sumasakay.  [30]  leo_lastimosa@abs-cbn.com

Arangkada for June 8, 2007

        SENTRO SA LOTTO            

 

        Ang bugtong nahibaw-an sa Philippine Charity Sweepstakes Office (PCSO) mahitungod sa mananaog sa P126.8 milyones sa bola sa lotto karong semanaha mao nga napalit niya ang tiket gikan sa outlet sa F. Ramos St. sa Dakbayan sa Sugbo.  Pulos na lang mga istorya nga di matino ang ubang gisumpay nga kasayuran mahitungod sa labing bag-ong multi-milyonaryo sa Pilipinas—nga taga Guadalupe siya, nga 30 anyos pa, nga lalaki, nga inhinyero, ug nga silingan rang Cebu City Mayor Tomas Osmena.

        Kay wa may bisan gamayng kasayuran mahitungod sa mananaog nga nahimutang sa tiket, mahimo sab nga di siya Sugbuanon kay nakahapit lang sa Ramos (daghang nagpuyo sa boarding houses sa Ramos nga mga tinun-an o mga trabahante nga taga laing lalawigan), nga labaw nang di taga Guadalupe ni silingan sa mayor, nga 60 anyos na, nga babaye diay, ug nga di siya inhinyero.

-o0o-

        Si Roberto Pio Cinco, ang tagduma sa lotto operations sa Sugbo, nitug-an sa DYAB Abante Bisaya nga makobra ug maggasto na lang sa mananaog ang iyang dakong daog apan mahimong sila dinhi sa Sugbo di lang gihapong kaila niya.   Pipila sa higpit nga mga lagda sa seguridad aron pagtino nga luwas ang mga mananaog sa lotto gikan sa mga kriminal ug mga mapahimuslanon:

·         Patalikdon sila sa pagkuha sa hulagway sa ilang pagdawat sa dagko nilang premyo gikan ni PCSO Chairman Serge Valencia; ug

·         Ang tseke nga ilang madawat mahimong idiretso og deposito sa sanga sa Land Bank of the Philippines nga naa ra sab mahimutang sa sud sa samang building ug busa nay bisan gamayng risgo inig gawas nila.

Maong nitambag si Cinco sa mananaog karong

semanaha, ma-Sugbuanon man siya o dili, ug sa umaabot nga mga mananaog sa lotto nga di na sila kinahanglang magda pa og police escorts o bodyguards sa ilang pagkobra.   Kay madugangan lang hinuon ang ilang hataganan og balato.

-o0o-

        Si Cinco niluwat sa mosunod nga mga katin-awan nganong dako kaayong halin sa lotto dinhi sa Sugbo kon itandi sa ubang bahin sa nasud:

·         Ang Sugbo maoy sentro sa minilyon ka mga dumuduong—magpapatigayon, mamumuo, tinun-an o turista—gikan sa nagkalainlaing mga lalawigan sa Kabisay-an ug Mindanao;

·         Kay sentro man sa patigayon sa Kabisay-an ug Mindanao, mas daghang kuwarta ang magbinayloay dinhi sa Sugbo; ug

·         Ang mga Sugbuanon mahigugmaon sa pagpamasin sama sa derby, sweepstakes ug bisan na gani sa ilegal nga mga sugal sama sa tigbakay.

Si Engr. Nigel Paul Villarete, Development ug Planning

Officer sa Dakbayan sa Sugbo, dunay laing pangagpas:  Mas dako ang halin sa lotto dinhi kay nagpabiling luwas ang Sugbo gikan sa jueteng ug last two ug inanay na gyong napapas ang karaang kabuang sa masiao.   [30]  leo_lastimosa@abs-cbn.com

Arangkada for June 7, 2007

        WOW, KAUWAW

 

        Human nila pasanginli nga namakak, nagpataka ug nagsamuksamok lang sa iyang mga pasangil, ug human nila siya bugalbugali nga upaw ug buangbuang, ang kadagkoan sa Kapitolyo sa Sugbo nga gipangulohan ni Gobernador Gwen Garcia nikumpisal nga nagsulti diay sa tinuod si Crisologo Saavedra sa iyang pangangkon nga dunay dugang P261 milyones nga gasto sa pagtukod sa Cebu International Convention Center (CICC) nga gipaningil na sa WT Construction.   Apan inay manlipaghong sa kauwaw, si Garcia nipili sa pagpadayon sa pagbuong sa kadungganan ni Saavedra pinaagi sa pagpanghilabot sa iyang pribadong negosyo ug security escort.

        Mao ni tinuod nga dagway sa liderato sa Kapitolyo.   Bisan unsaon pag-retoke sa ilang gamhanang makinarya sa propaganda, nasihag ang ilang kapating ug ka-way kaikog sa Sugbuanong mga magbubuhis.  Nga human gipasaligan nga labihang baratoha sa CICC, karon gi-ulog-ulogan na sab nga wa pa diay mahuman ang kuwentada kay labihan man diayng dakoa sa istruktura nga ilang gitukod.

-o0o-

        Kon tuohan ang balitok karon ni Garcia nga di pa diay to mao ang P581 milyones nga iyang gipangugatan atubangan sa diriyot mapasmo niyang mga dinapit sa Capitol Social Hall niadtong Mayo 3 nga mao ray naggasto, nganong nangahas na man siya pagtandi sa CICC sa susamang buildings sa ubang bahin sa nasud?   Kalangay ba sa paniudto maoy nakalipat niya nga di makiangayon ang pagtandi sa wa pa mahumang kuwentada ngadto sa ubang nahuman nang mga transaksiyon?   O nisuway gyod siya paglipat sa mga Sugbuanon, suma sa pasangil ni Saavedra atubangan sa Visayas Ombudsman, ug nasakpan lang?

        Karong nabisto na nga dul-an gyod diay sa P1 bilyon ang naggasto sa CICC, asa man kuhaon ni Garcia ang kuwarta nga nilapas sa gahin sa Cebu Provincial Board?   Nagplano ba siya paghapak sa dugang gasto ngadto sa gisigehan niya og hisgot nga "reconfiguration" sa CICC?  Di ba mas lisod ipatin-aw nganong mamahimong kabahin sa "reconfiguration" ang electrical, plumbing ug ubang trabaho nga gikinahanglan sa di pa ablihi ug sugdi paggamit ang CICC niadtong Disyembre nga gi-detalye sa WT sa ilang paningil nga gilawalawaan sa Kapitolyo sukad pa niadtong Pebrero 21 ning tuiga?

-o0o-

        Gibahaan ang Arangkada sa DYAB Abante Bisaya og mga tawag gikan sa mga Sugbuanon nga nakasud sa CICC sa nangaging mga semana.   Nga mahimong madugangan pa karong nabisto na nga mahimong moabot gyod diay og P842 milyones ang gasto sa CICC.  Gawas kon kapamatud-an sa Kapitolyo ang WT, di si Garcia, maoy namakak.

        Matod sa mga nakalibot sa CICC ug nakakita sa nangliki nang bungbong, naguba nang mga pansayan ug namurot nang carpet, labihan kakasarangan sa ilang nakita nga nagmahay sila nga naghago pa sa pagsud inay pagpabilin na lang nga magpaantaw sa gawas.   Maong inay motuaw nga, "Wow!," nakaingon sila nga, "Kauwaw!"  [30]  leo_lastimosa@abs-cbn.com

Arangkada for June 6, 2007

        LABAW SA LOTTO

 

        Si Crisologo Saavedra, ang responsable sa pagkabisto sa giingong mga eskandalo sa mga proyekto sa niaging 12 ^th Asean Summit nga gipahigayon dinhi sa Sugbo, nangangkon nga labaw pa sa nakadaog sa lotto ang mga Sugbuanon tungod sa pagkahunong sa mga transaksiyon nga iyang gibisto ngadto sa publiko.   Tungod sa iyang mga expose, si Saavedra nipahibawo sa iyang pagtambong sa Arangkada sa DYAB Abante Bisaya nga nadaginot sa Sugbuanong mga magbubuhis ang mosunod:

·         P300 milyones ang nadaginot sa gahin alang sa decorative ug street lamps sa mga dakbayan sa Sugbo, Mandaue ug Lapulapu;

·         P20 milyones sa surveillance cameras nga hangtod karon wa dawata sa kapolisan; ug

·         P261 milyones nga dugang gahin sa Cebu International Convention Center (CICC) nga, niya pa, gitagoan ni Gobernador Gwen Garcia gikan sa mga Sugbuanon atol sa kuwentada-nga-way-dokumento nga iyang gipasiugdahan dayong eleksiyon.

-o0o-

        Ang P581 milyones sa atong buhis nga naluwas gikan sa gikahadlokang pangurakot tungod sa exposes ni Saavedra mas dako tinuod sa P126.8 milyones nga nadaog sa bulahan nga molupyo sa Guadalupe, Cebu City sa labing uwahing bola sa lotto sa Philippine Charity Sweepstakes Office (PCSO) karong semanaha.

        Kon wa mong kabantay, samang kantidad ang gideklarar ni Garcia nga iyang naggasto sa pagtukod sa CICC.   Ambot tinuyo ba o naatol lang, si Saavedra mas nadasig sa panagtakdo sa duha ka kantidad nga iyang giisip nga laing di malalis nga timailhan nga magmalampuson gyong iyang kawsa bisan sa kadagko sa mga kalyo nga iyang natamakan.

        Bisan kon siyay nakabisto sa giingong mga kahiwian ug nakaaghat sa Visayas Ombudsman pagbaraw sa mga transaksiyon, si Saavedra nahiagom gihapon sa mga pagpanggukod ug pagbugal-bugal, kasagaran gikan sa mga turutot sa Kapitolyo.   si Saavedra mapasalamaton hinuon nga ang kasarangang mga molupyo nga iyang masugatan sa kadalanan nitimbaya niya, nidasig sa iyang gihimo ug nipasalig nga nangaliya ang tibuok nilang pamilya alang sa iyang kaluwas ug kalamposan.

-o0o-

        Inay tarungon pagtubag ang mga pasangil ni Saavedra kon tinuod bang niabot og P842 milyones ang kinatibuk-ang gasto sa CICC ug nga iyang gitago gikan sa mga Sugbuanon ang P261 milyones nga giingong gipaningil sa WT Construction sa dugang gasto, si Garcia gipasanginlang naningkamot pagsimang sa atensiyon sa mga magbubuhis:

·         Gikiha, gipailisan ug gipasuspenso niya si Acting Deputy Ombudsman Virginia Palanca-Santiago gikan sa pag-imbestigar sa mga pasangil ni Saavedra;

·         Gihudlat niyang mga kawani nga gidudahang maoy nanghatag sa mga dokumento sa CICC ngadtong Saavedra nga ipanglabay gawas sa Kapitolyo; ug

·         Gihilabtan na niyang pribadong negosyo ni Saavedra, apil nang guwardiya nga gidestino sa kapolisan human nakadawat og mga hulga sa iyang kinabuhi, gawas nga gipasidan-an sang pasakaan og kasong libelo uban ang mas dakong danyos sa layong hukmanan sa, nakatag-an mo, Barili.   [30]  leo_lastimosa@abs-cbn.com