Arangkada for July 11, 2008

            PUSTA SA PIKAS

 

            Tanang linalang nga may kasingkasing, gikan sa Santo Papa ngadto nilang US Pres. George Bush ug Bill Gates, natandog sa pagbangotan sa mga kapamilya sa mga pasahero sa MV Princess of the Stars nga gisilotan sa way kinutoban nga pagpaabot—masawopan, masidlakan ug masawopan na lang sab pagbalik sa adlaw sa ilang paghuwat—sa tinong kasayuran buhi o patay na ba ang ang ilang mga minahal sa kinabuhi; kon buhi pa, naluwas na ba; o kon patay na, nabangalan na bang mga lawas.

            Gawas lang sa mga magpapatigayon.  Nga inay mosimpatiya, o bisan motahud na lang, sa kasakit nga gihambin sa mga biktima, mas nipalabi sa gugma sa ilang mga patigayon ug sa ilang kahingawa nga maibanan ang ilang ginansiya.

-o0o-

            Tanang mabuot nga lungsoranon, gikan sa labing gamayng mangingisda ngadto sa labing gamhanang mga senador ug mga kongresista, nasilag sa kompaniya nga bisan may unom na ka barkong nalunod ug may unom ka libo ka kinabuhi nang nakalas nagpadayon sa ilang pagpabaya, sa kaluag pagpatuman sa mga lagda sa kaluwas sa nahibilin nilang mga barko ug sa pagpakabuta-bungol lang sa mga panginahanglan sa mga biktima sa katalagman nga nisangpot sa ilang pagsungasong inay pagtago gikan sa bangis nga bagyo.

            Gawas lang sa mga magpapatigayon.  Nga inay modason sa awhag alang sa makiangayong pag-alagad sa publiko, ug inay mobarug batok sa pagpasagad ug pagpalabi sa kita inay sa kaluwas sa kinabuhi ug kabtangan sa kadagatan, nidupa na man hinuon sa kompaniya nga angay na gyong silotan ug pailhon sa higante nilang mga kasaypanan.

-o0o-

            Way ligdong nga opisyal sa kagamhanan nga molalis sa panginahanglan paghunong na sa pagpabaya sa nagkalainlaing mga ahensiya nga gitugyanan pagduma sa industriya sa barko.  Way tarung nga opisyal sa kagamhanan nga molantugi sa panginahanglan pag-umol og mas higpit nga mga lagda aron nga di nang kalutaw ang mga lungon sa kadagatan.

            Gawas sa mga politiko nga tua kapusta sa pikas.  Nga inay motabang sa nagbuntaog nga gasto sa pagkaon ug ubang panginahanglan sa mga biktima, nipili hinuon pagdupa sa hakog nga mga magpapatigayon.  Inay modapig sa makaluluoyng mga biktima, niulug-ulog na hinuon sa mga magpapatigayon nga naa sa posisyon pagpabusdik sa ilang puntil sa kampanya.

-o0o-

            Apan wa ta matawo gahapon.  Nahibawo ta nga bisan unsa kasibaw ang mga protesta batok sa Sulpicio, mas gamhanan gihapon ang tingog sa pipila nga mga dagko kay sa mas daghan nga gagmay.  Maong sa gusto nato ug sa dili, makalutaw gyod pagbalik ang mga barko sa Sulpicio.

            Sagdi lang.  Ila pa man ron.  Timan-an hinuon nato ang ilang mga dagway.  Aron nga kon simbako-layo-ra-to-tabukon-og-pito-ka-lawod may barko na sang malunod ug mga pasaherong mangamatay mahibawo na ta kinsay puntiryahon sa kinakusgan nga tulisok.  [30]  leo_lastimosa@abs-cbn.com