Arangkada for July 22, 2008

            GILAWOG TAS TIRONG

 

            Ang labing dakong kahuyangan sa kadagkoan sa mga buhatan sa kagamhanan pagpatuman sa mga balaod mao ang ilang panghunahuna nga matuman nang ilang tahas kon katabangan ang mga biktima sa krimen ug ubang matang sa pagpangyatak sa tawhanong katungod.  Hingpit na nilang nataligam-an ang labing mahinungdanong tahas:  Ang pagpanalipod sa katawhan gikan sa krimen ug pangabuso sa wa pa mahitabo ang krimen ug pangabuso; ug ang pagbadlong sa mga kriminal ug mga abusado sa wa pa silang kahimo og krimen ug pangabuso.

            Lalisunon nang daan ang pangangkon sa nagkalainlaing mga buhatan sa kagamhanan nga natabangan nila ang mga biktima sa krimen ug pangabuso.  Mas dakong eskandalo ang wa na paghisgot sa kadagkoan sa kagamhanan sa ilang kapakyas pagpugong sa krimen ug pangabuso.

-o0o-

            Nabantang ning makauuwawng kapakyas sa kagamhanan sa panghambog sa kapolisan nga taas kaayo ang ilang crime solution efficiency sa dagkong mga dakbayan sa nasud.  Wa na lang gani magtagad ang kapolisan pagpatin-aw sa ilang kapakyas pagbadlong sa pagsulbong sa kriminalidad.  Nangahas pa gani si PNP Chief Avelino Razon pagpasidaan nga mosaka pag-ayong krimen, labi nang kawat, sa mosunod nga mga adlaw tungod sa pagsulbong sa presyo sa mga palaliton.

            Sa ato pa, ang kapolisan nitahan na sa mas mahinungdanon nilang kampanya pagpugong sa krimen.  Maong gipaandam na lang ang katawhan sa pagpanghasi sa mga kriminal.  Uban ang ulug-ulog, nga utro sang lalisunon, nga kon mabiktima sila og krimen dako ang kahigayonan nga madakpan ang mga kriminal ug mahatagan sila og hustisya.

-o0o-

            Apan ang crime deterrence nagpabilin nga mahinungdanong tahas sa kapolisan.  Maong duna pay mga polis nga nagpatrolya sa kadalanan.  Ang postura sa ilang kadagkoan makapaduda hinuon nato kon ang pagpatrolya gitumong ba gyod pag-abog sa mga kriminal o papogi lang.

            Ang kapolisan wa mag-inusara sa ilang kainutil.  Mao sang ubang buhatan sa kagamhanan.  Inay maningkamot pagpanalipod sa katawhan, mangiyugpos na lang sa ilang mga buhatan ug magpaabot nga may maghago pagpatabang tungod sa kaalaotan nga ilang nahiagoman.

-o0o-

            Sama pananglit sa LTO.  Inay mohimo og mga lakang pagpanalipod sa mga pasahero gikan sa abusadong mga drayber, sama sa pagpanakay sa PUJs ug taxis pagtabang pagtino nga natuman ang mga taripa ug nga wa maniobraha ang mga metro, nag-akin-akin lang hinuon sa ilang mga lingkoranan uban ang burot kaayong mga tiyan pagpaabot nga may masaag sa mga pasahero nga nabiktima sa lubag ug ubang palusot.

            Way kalainan ang LTFRB.  Inay manlimbasog paglikay sa panagsungi tali sa mga drayber ug mga pasahero, mao na hinuoy nihaling sa panagsungi.  Salamat sa inat-inat nila nga mga lagda.  Ug sa way klaro nilang mga taripa.  Nga hanap pa sa diyes panas ang mga ruta ug ang gitakda nga bag-ong mga plitehan.  [30]  leo_lastimosa@abs-cbn.com