Arangkada for July 18, 2008

            TAPHAW UG BANGA

 

            Ang LTFRB dugay na nga gipasanginlan nga way klarong sukaranan sa pagtakda sa plitehan sa mga pamasaherong sakyanan.  Nga ang plitehan nga ilang gipatuman alang sa jeepneys, buses ug taxis pulos mata-mata.  Gipasikad lang sa banabana.  Labing klarong ebidensiya ini mao ang bantang nga paglapas sa drivers ug operators sa ilang taripa:  May mga ruta nga nangobra og mas dagkong plitehan; may mga ruta sab, labi nang mga gisubay sa buses dinhi sa Sugbo, nga nangolekta og mas ubos nga plitehan.

            Ang biktima mao ang mga pasahero, drivers ug operators.  Kalibog maoy mohakop nila matag pasaka sa plitehan.  Nga kasagaran mosangpot sa init nga lalis.  Sila na hinuoy nag-unay.  Nga pulos man unta biktima, ug klarong igo lang gisabong, sa kadagkoan sa LTFRB ug sa ilang mga padrino.

-o0o-

            Nahadlok hinuon kong mas taphaw ang bag-ong liderato sa LTFRB.  Si Tsirman Thompson Lantion gihulagway nga mas di andam sa iyang mga gimbuhaton kay sa gisundan niyang mga pangu sa ahensiya.  Di lisod ang pagpangita og mga ebidensiya sa kabanga sa iyang pamunoan:

·        Giyak-an niyang mga petisyon sa usbaw sa plitehan aron lang magnukus-nukos ug mag-inat-inat sa bag-ong plitehan dihang naapiki na sa panahon kay naninuod nang transport groups pagpasidaan sa pagwelga kon padayong bungul-bungolan ang makiangayon nilang mga gipangayo;

·        Giaprobahan ang usbaw sa plitehan nga wa pang katino pila ang tukma nga minimum nga plitehan sa mga lalawigan gawas sa Metro Manila, sama sa Sugbo nga unang gipahibawo nga P7.50 ang bag-ong plitehan, aron lang pakuratan nga P8 gyod diay ang tinuod nga minimum nga plitehan, o makalipong nga P2 nga usbaw sa karaang plitehan nga P6; ug

·        Naprinta na untang mga taripa apan gipailisan kay uwahi nang nakahunahuna nga lainon ang kolor alang sa Luzon, Kabisay-an ug Mindanao.

-o0o-

            Labing uwahing timailhan sa kakatag sa liderato ni Lantion mao ang pag-usab-usab sa gitakdang panahon pagluwat og stickers nga motugot sa taxi drivers pagpatong og P10 sa ilang flagdown rate nga P30.  Unang gipahibawo nga karong semanaha ipanghatag ang stickers, dayon giuswag ngadto sa Hulyo 15, dayon Hulyo 24 na sab, apan karon gitakda na sab nga unya na sa Agosto 1.

            Tungod sa kisikisi sa taxi drivers ug operators, niluwat si Lantion og mas binuang nga kamandoan:  Makahimo nang taxi drivers pagpangayo og P10 gikan sa mga pasahero sugod sa Hulyo 25 bisan wa pay stickers.  Apan di kuno isipon ang P10 nga patong sa flagdown rate kon dili "tip" lang.

-o0o-

            Mao ni nakapait sa liderato sa LTFRB karon.  Di lang nga mas taphaw, mas di kamao ug mas makalibog kay sa nangaging mga pamunoan.

            Kon dili gitugotan pa gyong maduhigan sa pamolitika ang plitehan.  Nga gigamit nang kahimanan pagpalig-on sa ilang amo nga dugay nang gihinginlan sa katungdanan.  [30]  leo_lastimosa@abs-cbn.com