Arangkada for July 15, 2008

            LIKOY SA LTFRB

 

            Tan-awa ra gyod ka-way klaro sa LTFRB.  Ilang tsirman nga si Thompson Lantion nipasalig nga ang taripa sa inusbawang plitehan sa PUJs mahimong makuha sa mga drayber ug operators bisan kon di hingpit nga mabayran ang P520 nga filing fee.  Mahimo rang P50 unay ibayad.  Mahimong data-datahan lang ang balanse hangtod sa Septiyembre karong tuiga.  Matod ni Lantion gitumong ni aron nga di maglisudlisod ang mga drayber ug operators pagkolekta sa mas taas nga plitehan sa labing daling panahon.

            Si LTFRB 7 Director Romulo Bernardes nakatambong sa tigom diin gipahibawo ni Lantion ang kausaban sa lagda.  Apan wa ni niya ipatuman alang sa mga drayber ug operators sa Sugbo, Bohol, Negros Oriental ug Siquijor.

-o0o-

            Ang hinungdan?  Mas kurog si Bernardes sa COA.  Kay ni Lantion.  Nipasabot si Bernardes sa DYAB Abante Bisaya nga sulti lang ang gihimo ni Lantion.  Wa pay sinuwat nga kamandoan paghatag sa pabor ngadto sa PUJ drivers ug operators.  Maong magpaabot pa siya og papel gikan sa ilang ulohang buhatan.

            Nabalaka si Bernardes nga siyay maapiki sa COA kon ipatuman ang sugo ni Lantion.  Kay kon ihatag ang taripa bisan P50 ray bayad, wa nay seguro kanus-a maimpasan ang balanse.  Sama nga wa pang kahibawo si Bernardes unsaon pagpugos ang mga drayber ug operators pagbayad sa balanse sa wa pay Septiyembre.

            Wa hinuon mag-inusara si Bernardes pagduda sa kamakiangayon sa sugo ni Lantion.  Kay bisan ang ulohang buhatan sa LTFRB naneguro gyod pagpangolekta og P520.

-o0o-

            Di hinuon ang dakong bayranan maoy labing dakong problema sa mga drayber ug operators nga nahiagom sa taas kaayong pila sa LTFRB 7.  Kon dili ang sistema pag-apud-apod sa mga taripa.  O ang kakuwang og sistema.  Lisod sabton ang sistema sa LTFRB nga ang mobayad karong adlawa ugma pa kahatagan og taripa.

            Mas lisod sabton nganong nagkayamukat gihapon ang LTFRB.  Bisan kon ang mga petisyon sa uminto sa plitehan nag-ung-ong sud na sa pila ka buwan.  Ug bisan kapid-an na ka higayon nga nakapatuman ang LTFRB og mga usbaw sa plitehan.

-o0o-

            Ang mas dakong eskandalo mao ang pagnegosyo sa LTFRB sa mga taripa sa plitehan.  Bisan unsaon pagpaburot ang presyo sa ilang de kolor nga mga taripa, di gyong kaabot og P520 matag pahina.  Nganong pabayran man tuod ang taripa nga obligasyon man sa kagamhanan ang paggiya sa mga pasahero ug mga motorist?

            Kinaham nga lusot sa LTFRB mao nga filing fee ang P520, di bayad sa taripa.  Apan sangit gihapon.  Nganong pabayron man tuod ang PUJ drivers ug operators nga, gawas nga di ilang atraso ang way kinutobang pagsaka sa presyo sa lana, angay pa man gani unta silang tabangan tungod sa pagtidlom pag-ayo sa ilang kita?  [30]  leo_lastimosa@abs-cbn.com