Arangkada for July 23, 2008

            GASTO SA SULPICIO

 

            Di angayng magkuwenta sa ilang gasto ang Sulpicio Lines.  Kon nahug na lang sila karong tigkolekta sa mga patayng lawas sa mga biktima sa bagyong Frank, bisan di na mga pasahero sa MV Princess of the Stars, angay nilang dawaton ang ilang kapalaran.  Kay kon magsugod na silag kuwenta, mas maayong ato sab silang paninglan:

·        Sa dakong gasto sa lalawigan sa Romblon paghipos sa mga patayng lawas sa ilang mga pasahero, nga sa unang mga adlaw human sa trahedya ila lang gipasagdan nga madugta ug mangalisbo sa kadagatan ug kabaybayonan, ug pagpanagang sa gikahadlokang pagdagayday sa lana ug makahilong mga kemikal gikan sa nalunod nga barko; ug

·        Sa minilyon ka pesos nga balor sa kahasol, nausik nga kahigayonan sa panginabuhi ug nagusbat nga kaugmaon sa kapin sa 800 ka mga pasahero ug mga tripulante ug sa nagbangotan nilang mga kabanay tungod lang sa ilang pagpalarga sa barko bisan sa pagkusukuso sa bagyo.

-o0o-

            Kon tinuod ang pasangil nga ang Sulpicio say gipabayad sa P18 milyones nga giangkon sa Philippine Coast Guard (PCG) nga gasto sa pagpalihok sa ilang mga barko ug ayroplano pagpangita sa mga patayng lawas ug sa konsumo sa mga divers nga nag-ugkat sa mga patayng lawas gikan sa sud sa barko, angay nilang um-umon ang responsibilidad.  Kay sangpotanan lang ning tanan sa gipasangil nga pagpabaya ug pagsugal sa kinabuhi ug kabtangan sa mga pasahero tungod ug alang sa mas dakong kita.

            Di hinuon mabasol ang kadagkoan sa Sulpicio nga magping-it na.  Kay gawas sa minilyon ka pesos nga inadlawng kita nga nawagtang tungod sa paggakot sa ilang pamasaherong mga barko, kinahanglan pa gyod silang modugo sa P4 bilyones nga gasto sa pagkuha sa mga patayng lawas ug makahilong mga kemikal gikan sa nalunod nilang barko.  O labing menos katunga sa kantidad, P2 bilyones, nga giawhag sa Titan Salvage Corp. nga bayran og cash sa di pa sila mosugod pagpalutaw pagbalik sa barko.  Ang laing katunga kinahanglang garantiyahan sa kagamhanan paneguro kon di mobayad ang Sulpicio.

-o0o-

            Di ra ni maoy gastohan sa Sulpicio.  Kon gusto nilang maluwas ang ilang prangkisa, kinahanglan nilang tagbawon ang kapid-an ka mga buwaya nga naglaway nang nag-atang ug nag-ilogay paghambat nila.  Mahimong sayon rang luwason ang ilang prangkisa sa Marina.  Apan ang mga kongresista naghinamhinam nang mopasar og balaodnon nga momando sa dagkong mga kompaniya sa barko pagkuha og prangkisa gikan sa Kongreso.

            Makaayo hinuon alang sa Sulpicio ang pasiunang mga tilimad-on gikan sa mga kongresista.  Ang labing gilat-an sa mga magbabalaod mao rang Pagasa, ang PCG, ug Del Monte Philippines.  Pulos taphawng mga pangutana alang sa kompaniya.  Ang mga kongresista mahimong nabusog na.  O nagpadugang lang sa pusta.  [30]  leo_lastimosa@abs-cbn.com