Arangkada for July 10, 2008

            DUGANG TABANG

 

            Madridejos, Isla sa Bantayan—Bag-o lang nahuman ang pag-apud-apod sa mga hinabang alang sa mga biktima sa bagyong Frank dinhi.  1,363 ka mga pamilya nga nawad-an sa ilang mga panimay ang nakadawat sa hinabang.  Kapoy nang among mga boluntaryo nga maoy nanakwat ug nanghakot sa mga hinabang.  Gikan pa silang nagtukaw sa tibuok adlaw nga pag-repack sa mga hinabang ug sa tibuok gabii nga paglawig sa barko paingon dinhi sa isla.  Apan wa pa mahuman ang ilang gimbuhaton.

            Nag-repack na sab sila og mga hinabang alang sa Bantayan.  Sa 1,400 ka pamilyang naigo sa bagyo, 500 pay among nahatagan og hinabang niadtong Sabado.  Busa utangan pa mi sa 900 ka mga pamilya nga nawad-an sab sa ilang mga panimay.  Ug hangtod sa akong pagsuwat ini,a wa pa mi kakuha sa tino nga gidaghanon sa mga pamilyang naapektahan sa Sta. Fe, ang ikatulong lungsod sa isla. 

-o0o-

            Lisod ang paghulagway pinaagi lang sa mga pulong sa nagbaha nga kamanggihatagon sa mga Sugbuanon nga nisanong dayon sa among pagpangayo og hinabang alang sa mga biktima sa bagyo.  Maong tuguti nga suwayan namo pagsukod ang gidaghanon sa nagbaha nga mga hinabang pinaagi sa mga numero.

Sa kinatibuk-an, ang Kapamilya Relief Campaign sa DYAB Abante Bisaya ug ABS-CBN Cebu nakahatag og hinabang ngadto sa 2,952 ka mga pamilya.  Ang relief goods nga naapud-apod na gibanabanang mobalor og P1,292,730. 

Mao ni labing ubos nga banabana sa balor sa mga hinabang.  Apan hinaot nga makahatag ni ninyo og pasalig nga ang tanang hinabang, madako man o magamay, nakatabang paghaw-as sa mga biktima gikan sa pait nilang kahimtang.

-o0o-

            Ang 2,952 ka mga pamilya naglakip sa mosunod:  1,400 ka pamilya sa 14 sa 25 ka barangay sa Bantayan; 1,363 ka pamilya sa tanang 14 ka barangay sa Madridejos; ug 189 ka pamilya sa duha ka barangay sa Talisay City.

            Ang matag pamilya nakadawat og food pack ug sako sa mga sinina.  Ang matag food pack dunay duha ka kilong bugas humay (gitakda lang namo nga tag-P35 matag kilo), tulo ka sardinas (P10 matag lata); ug lima ka putos sa noodles (P5.50 matag usa).  Ang matag sako dunay 20 ka piraso sa sinina nga gibanabanang mobalor og tag P20 matag usa.

-o0o-

            Bisan sa kadako na sa hinabang nga nahatag, daghan pang mga biktima sa bagyo nga wa pa namo maabot.  Sa Sta. Fe, kapin sa 2,000 ka pamilya ang naapektahan.  Gatosan sab ka pamilya ang nabiktima sa San Remegio, Bogo, Medellin ug Daanbantayan.

            Maong sa makausa pa manuktok na sab mi sa inyong kasingkasing.  Kaliboan pa ka pamilya ang kinahanglan natong tabangan sa amihanang Sugbo.  Wa pa gani maapil pag-ihap ang mga pamilya sa mas nagrabehan nga mga lalawigan sa kasadpang Kabisay-an.  Daghang salamat daan.  [30]  leo_lastimosa@abs-cbn.com