Arangkada for July 5, 2008

          ATRASO SA SULPICIO

 

          Karong nasakpan sa Board of Marine Inquiry (BMI) nga gisakripisyo sa Sulpicio Lines ang balanse sa MV Princess of the Stars aron makadugang og kargamento, ang pagbasiyo sa pipila ka ballast gituohang nakapatakilid dayon sa barko dihang gikusu-kuso sa higanteng mga bawod sa bagyong Frank, ipadayon pa ba gihapon ni Pres. Arroyo ang pagpalarga sa mga barko sa Sulpicio bisan nagpadayon pang imbestigasyon sa pagkalunod sa labing dako nilang barko?

          Kon tugotan ang mga barko sa Sulpicio paglawig uban ang mga kargamento, unsa man ang garantiya nga di na sab nila isakripisyo ang balanse ug kaluwas sa mga barko pabor sa pagpaburot sa ilang ginansiya gikan sa mas daghang kargamento?  Makabadlong ba ang pagpasakay sa mga inspektor sa kagamhanan, o madugangan lang ang kahigayonan sa pangurakot?

-o0o-

          Nabisto na unsay tinagoang hinungdan sa kalit nga paglumoy sa baruganan sa kagamhanan batok sa Sulpicio.  Human sa iyang masuk-anong pagtulisok sa Sulpicio nga maoy sad-an sa pagkalunod sa barko ug pagkamatay sa gatosan ka mga pasahero, si Arroyo kalit lang nalukmay ug nahimo nang labihan kamanggiluy-on sa pamilyang Go nga maoy nanag-iya sa Sulpicio.  Ang kahibung sa katawhan natubag dayon dihang niangkon ang usa ka obispo nga maoy nitabang sa mga Go pag-lobby sa palasyo.

          Maayo ning panaminan sa ubang pribadong mga kompaniya nga giinitan sa kagamhanan.  Di diay banggiitang mga abogado ang labing makapanalipod sa ilang mga patigayon.  Ambot tungod ba kaha sa kadaghan sa kasal-anan nga gipasangil batok niya, si Arroyo mas kurog diay sa mga prinsipe sa Simbahang Katoliko.

-o0o-

          Ang kinaham nga lusot sa palasyo sa ilang paglingiw sa daghan nang kalapasan sa Sulpicio—gikan sa paglarga bisan bagyo, kalangay pagtubag dayon sa distress call sa kapitan, kapakyas pag-atiman dayon sa mga panginahanglan sa mga kapamilya sa mga pasahero, kalangay pag-ugkat, pagpreserbar ug pag-ila sa mga patayng lawas, kapakyas pagtug-an sa makahilo nilang kargamentong pesticide ug ngadto sa kakulian sa uban pa nilang mga barko—mao nga di ron ang panahon sa pagbinasolay.

          Dasonan sa katawhan ang awhag sa panaghiusa kon inosente pa lang unta hingtungdang kompaniya.  Apan kon lisod nang iphon ang kadaghan sa mga atraso ug kon ang pagpasaylo nila mahimong makapakalas lang sa dugang kinabuhi, labing dinaliang silot ug di paglingiw ang tukmang tubag.

-o0o-

          Wa nay kahigayonan nga makanselar ang prangkisa sa Sulpicio.  Di lang tungod sa kadako sa bahin sa merkado nga ilang gialagaran (40%) kon dili tungod sa kadagko sa ilang mga alyado (Malakanyang, House ug Senado).

Maong samtang mahimong wa nay barko nga matanggong sa bagyo, tungod sa lagda nga wa nay palargahon sa signal number 1, salamat sa pangiyugpos sa gobyerno, wa gihapon tay panagang batok sa mga barkong mapawongan og makina, mabara, masunogan, o motakilid ug malunod bisan usa ka dangaw rang bawod.  [30]  leo_lastimosa@abs-cbn.com