Arangkada for May 9, 2008

       TAPHAWNG FORECAST

 

       Unsay imong bation kon ang imong gipaminaw nga magsisibya moingon:  "Atong oras karon pasado alas-9 na."  Dako ang kahigayonan nga maglibog ka, dayon saputon, mobalhin og estasyon, o masuk-anong mopawong sa radyo.

        Imo nang katungod.  Mirisi sa magsisibya.  Angay siyang silotan sa tagduma sa sibyaanan.  Kay kon magpadayon sa iyang taphaw nga time check, mahimong mawad-an sila og mga tigpaminaw.  Mokagiw ang ilang advertisers.  Motidlom ang ilang kita.  Di nang kapanuweldo sa magsisibya ug ubang mga kawani.  Ug mahimong manak-op na lang gyod ug mohunong sa pagsibya.

        Ang pagpahibawo sa Pagasa sa nahimutangan sa nangaging mga bagyo sa daghan nang katuigan mas hanap pa kay sa time check sa magsisibya.  Ang mas daotang balita mao nga di nimo sila mabadlong.

-o0o-

        Unsay imong bation kon makadungog ka sa forecaster sa Pagasa nga magkanayon:  "Ang bagyong Butchoy nahimutang 476 kilometros sa silangang Mindanao."  Dako ang kahigayonan nga maglibog ug saputon ka.  Kon mobalhin ka og sibyaanan, mahimong lain nang forecaster sa Pagasa ang imong mabatian apan samang taphaw nga script ang iyang gibasa.

        Kon imong pawngon ang radyo, bisan unsa ka pa kamasuk-anon, dako ang kahigayonan nga mapugos ka pagpatingog ini pagbalik.  Kay mahadlok kang mablangko asa paingon si Butchoy.  Nahadlok kong di na kang kapugong pagbalibag sa radyo kon madunggan nimong forecaster nga magkanayon:  "Si Butchoy nag-irog paingon sa kasadpan amihanan kasadpang bahin sa nasud sa gikusgong 15 kilometros matag takna."

-o0o-

        Kaluoy sa radyo.  Maoy imong mapahimungtan tungod sa makauuwawng anomaliya sa weather forecasting sa nasud sukad pa sa atong katiguwangan.  May katungod ka sa pagreklamo, sa pagpangayo og mas tin-aw ug mas masabot nga forecast.

        Apan wa nila paminaw ang sibaw ug dugay na kaayong awhag sa nagkalainlaing hut-ong sa katilingban pagtarung sa ilang forecast.  Ang forecasters sa Pagasa Mactan nahimo lang tigbasa sa forecast nga sinuwat sa taga Manila, bisan sa mga higayon nga nisukwahi sa bahawng script ang aktuwal nga kahimtang sa panahon nga ilang nasaksihan dinhi sa ato.

-o0o-

        Way mahimo silang Direktor Oscar Tabada ug kaubanan sa Pagasa Mactan pagbaraw sa kahiwian nga gipamugos sa ilang ulohang buhatan.  Usa sa nahibiling pahinumdom nato unsa ka-arogante ang nasudnong kagamhanan mao ang pagsugod sa Pagasa sa ilang forecasts, bisan nagbunok ang uwan sa Sugbo, nga:  "Ang Metro Manila init apan may pat-ak pat-ak nga uwan."

        Apan silang Tabada ug kaubanan di kinahanglang magpagapos sa script sa Manila.  Mahimo nilang nganlan ang mga lalawigan sa silangang Mindanao nga labing duol ni Butchoy.  O hisgutan ang mga dapit sa kasadpan amihanang kasadpang bahin sa nasud nga gipadulngan sa bagyo.  O kuoton ang mubo nga hisgot sa kahimtang sa panahon sa Sugbo bisan kon gibutang sa kinatumyan sa forecast.  [30]  leo_lastimosa@abs-cbn.com