Arangkada for May 20, 2008

            POLITIKA SA PLITE

 

            Bisan kon makaayo sa mga pasahero ang pagyaka sa LTFRB sa tanang mga petisyon sa uminto sa plitehan, di makiangayon ang pamolitika sa Malakanyang.  Nga nakapasamot sa kaapiki sa panginabuhi sa mga drayber sa taxis ug jeepneys.  Labihang dakoa na sa uminto sa mga produkto sa lana.  Apan ang LTFRB pabiling nagpalinguglingog sa makiangayon nga awhag sa pagpausbaw sa minimum nga plitehan.

            Gibaraw ni Transportation Secretary Leandro Mendoza ang P0.50 nga pasiunang uminto sa plitehan sa PUJs nga gitugotan na unta sa LTFRB sugod karong Miyerkules.  Ambot unsa pay pagtuon nga gusto ni Mendoza.  Ang mga pasahero nakasabot na nga di makaayo sa kadugayan ang padayong pagpiit sa sektor sa sa transportasyon.  Mas maayo pang mas taas ang plitehan kay sa wa silay kasakyan.

-o0o-

            Sama sa naandan, lain na sab ning salida sa pamunoang Arroyo.  Gilikayan nila kutob sa mahimo nga mosaka ang plitehan.  Kay mosangpot sa pagmahal sa tanang inadlawng palaliton, apil nang kamunggay.  Nga mosangpot sab sa mas lapad nga katimawa ug mas hapdos nga kagutom.  Nga kon mahitabo makapaulbo sa kasuko sa mas daghang katawhan.

            Maong nidangop ang Malakanyang sa ilang kinaham nga taphawng mga sulbad.  Nipasalig pagpalapad sa P1 nga subsidy sa matag litro sa krudo.  Nga way natabang sa PUJ drivers kay mas lisod pang pangitaon ang gasoline stations nga nitanyag sa diskuwento kay sa kaligdong sa labing taas nga ang-ang sa burukrasya.  Hangtod karon wa pay napakanaog nga mga lagda unsaon pagpatuman ang dugang P2 nga subsidy.  Nagkayamukat mang bugas, gikuyawan tingaling mosilaob na gyod kon ang lana maoy ilang binuangan.

-o0o-

            Apil sa gilansang sa LTFRB mao ang plitehan sa taxi.  Nga wa pa kaayo mokisikisi kay ang kinabag-an nagtubil na man sa mas baratong LPG.  Apan ang labing dakong hulga mao ang pinatuyangan nga pagpangrehistro sa LTFRB sa bag-ong taxis.

            Unsa may nahitabo sa hiningusgang kampanya paghipos sa mga kolorum?  Nganong pabilin mang naghuot ang taxis nga naglanguylangoy sa kadalanan kay way pasahero?  Unsa katinuod ang mga pasangil nga ang mga kolorum ug ang peke og mga prangkisa igo rang gikilkilan maong nakapadayon sa pagdagan?

-o0o-

            Labing gikahadlokan sa Malakanyang mao ning mosunod:

·        Kon mosamot ang kalisod sa katawhan, tungod sa pagsaka sa plitehan ug sa presyo sa inadlawng palaliton, mabantang nga ang way kukaluoy nga pagbuhis sa gasolina ug ubang produkto sa lana maoy tinuod nga nakapaburot sa presyo;

·        Kon kapahinumdoman ang katawhan sa pinatuyangan nga pagpamuhis makaamgo sab sila giunsa pagwaldaswaldas sa mga tagduma sa kagamhanan ang buhis nga ilang hinagoan; ug

·        Kon mabistong taphaw diay ang ekonomikanhong kalamboan, nga maoy gisagang sa tanang pasangil sa pagpanikas ug pagpangawkaw, mahimong di na sama kamapasayluon ang kinabag-an.  [30]  leo_lastimosa@abs-cbn.com