Arangkada for May 13, 2008

            PRESYO SA KRUDO

 

            Naunay ko si tari.  Human nako sawaya ang forecast sa Pagasa nga taphaw kay igo lang niingon nga ang bagyo nagpaingon sa kasadpan amihanang kasadpan nga bahin sa nasud, inay moila sa mga lalawigan nga girumbo sa katalagman, nabawosan sab ko.

Usa ka tigpaminaw sa Arangkada sa DYAB Abante Bisaya nireklamo nga maglisod sila og sabot sa among balita nga ang presyo sa lana sa merkado sa kalibotan nisaka na ngadto sa $126 matag baril:

·        Una, di binaril ang pinalitay sa lana dinhi sa ato kon dili linitro; ug

·        Ikaduha, di dolyar ang kuwarta dinhi sa ato kon dili peso.

-o0o-

            Sa akong kauwaw, nidangop dayon ko sa Google, kansang search engine dunay built-in nga calculator ug converter.  Daghang tubag nga akong nakuha:

·        Segun sa Google calculator, dunay 117.347765 ka litros ang usa ka baril;

·        Alang sa Yahoo Answers, ang usa ka baril sa lana sa Estados Unidos dunay 158.9872956 ka litro; ug

·        Matod pa si WikiAnswers, dunay 184.8 ka litro ang usa ka baril sa krudo.

Samtang tigpaminaw nga nagpaila nga kawani sa usa sa mga kompaniya sa lana niingon nga ang usa nila ka baril sa gasolina kasudlan og 200 ka litro.  Kinsay nag-ingon nga sayon ang pagtuman sa imong kaugalingong tambag?

-o0o-

            Nakahukom ko pagpili sa tungatunga sa mga tubag, ang 159 ka litro sa Yahoo Answers.  Sunod nakong gihimo mao ang pagtino sa labing uwahing kalamboan sa presyo sa lana sa merkado sa kalibotan.  Segun sa Agence France Presse nius-os nang presyo gikan sa $126 matag baril.  Apan aron sayon rang kuwentahon, kay di man sab ko maayo sa math, gamiton lang nato ang $126.

            Gisusi dayon nako pilay closing rate sa peso atubangan sa US dollar:  P42.655, sa pagtak-op sa merkado sa alas-4:46 sa hapon.  Balik ko sa Google calculator.  Ang usa ka baril nga lana balor og P5,474.53.  Sa ato pa, ang matag litro sa lana sa merkado sa kalibotan balor og P33.80.

-o0o-

            Nga ubos kaayo kon itandi sa presyo sa mga produkto sa lana dinhi sa ato.  Apan ang krudo nga gipresyohan sa merkado sa kalibotan kinahanglan pang iagi sa refineries aron mahimong gasoline, diesel, kerosene, LPG ug ubang mga produkto.  Pun-an sa gasto sa transportasyon, makalusot ang mga kompaniya sa lana sa ilang pagpatong sa presyo sa mga produkto sa lana nga itubil sa ilang gasoline stations dinhi sa ato.

            Bisan sa kakuti sa pagpasabot sa mga balita sa mga pung nga masabtan sa kinabag-an sa mga tigpaminaw, hinaot nga di mabugnaw ang mga magsisibya.  Mas makaayo alang sa tanang hingtungdan kon hasta ang mga magsisibya, ug forecasters sa Pagasa, makasabot sa mga balita nga ilang gibasa.  [30]  leo_lastimosa@abs-cbn.com