Arangkada for May 4, 2007

        HIGALA NI DOKDOK

 

        Si anhing mayor Rogelio Ilustrisimo Sr. sa Sta Fe. sa isla sa Bantayan sa amihanang tumoy sa Sugbo labihang daghanang higala nga bisan ang iyang mga kaatbang sa politika nipadayag og kahinugon ug kalisod pagdawat sa kalit niyang kamatayon sa mga kamot sa wa pa mailhing mamumuno:

·         Si kanhi kongresista Celestino Martinez Jr. giubanan pa ni Mayor Ilustrisimo (nga mas naila sa angga nga "Dokdok") sa iyang pangampanya alang sa iyang anak nga si Celestino III (nga nidagan pagka kongresista sa ikaupat nga distrito) niadtong Martes, usa ka adlaw sa wa pa patya ang biktima, ug gitug-anan sa mga ngan (nga taga Sta. Fe ra sab) sa mga nanghulga ni Ilustrisimo pinaagi sa text; ug

·         Si kanhi CPPO chief Vicente Loot kinsa nitawag ni Ilustrisimo sa lain niyang angga nga "Dokie" ug niisip sa biktima nga suod niyang higala bisan sa ilang panagsungi sa politika, gani maoy dangpan sa iyang asawang si Daanbantayan Mayor Ma. Luisa Loot kon mahiagom sa mga intriga sa politika, kay suki man si Ilustrisimo sa ilang buwangan nga "Gallera de Mandaue" sa Dakbayan sa Mandaue.

-o0o-

        Apan ang labing inilang higala ni Mayor Ilustrisimo mao si Pres. Arroyo.  Nagkasuod sila niadtong senadora pa si Arroyo ug kugihan pa kaayong nagsuruysuroy sa nagkalainlaing kalungsoran sa Sugbo paghanig sa makinarya pagpatuman sa iyang mas dagkong politikanhong mga ambisyon.   Matod ni Kongresista Clavel Asas-Martinez si Ilustrisimo pa ang drayber ni Arroyo matag taak niya sa isla sa Bantayan niadtong mga adlaw nga di pa siya sunudsunuron sa mga sakop sa Presidential Security Group (PSG).

        Dihang nidagan si Arroyo pagka bise presidente sa eleksiyon sa 1998, si Ilustrisimo nananghid sa mga Martinez nga samtang mopaluyo siyang kanhi gobernador Lito Osmena, kinsa nidagan batok ni kanhi presidente Joseph Estrada, mahimo bang si Arroyo ang iyang paluyohan pagka bise presidente?

Mao nga sa tibuok Pilipinas, sa ikaupat nga distrito ra nidaog ang Osmena-Sueno ticket.   Apan sa Sta. Fe, nitug-an si Martinez sa Arangkada sa DYAB Abante Bisaya, si Arroyo gyod ang nangharos pagka bise presidente.

-o0o-

        Matod ni Martinez gitawgan siyang Arroyo niadtong Miyerkules sa gabii, pila lang ka oras human sa kamatayon ni Ilustrisimo, aron pagpadayag sa iyang dakong kasubo ug kahinugon.  Wa mobalibad si Arroyo sa hangyo ni Martinez nga ang National Bureau of Investigation (NBI) sa kaulohan ang mobanos sa imbestigasyon sa kaso.

        Si kanhi kongresista Martinez niingon nga andam siyang motug-an sa mga ngan ug ubang kasayuran nga gihatag ni Ilustrisimo ngadto sa mga imbestigador nga ilang masaligan.  Matod niya di silang kasalig sa lokal nga NBI ug kapolisan kay mahimo rang hudlaton sa dagkong mga politiko nga ilang gidudahang maoy tinuod nga mga utok sa kamatayon ni Ilustrisimo.   [30]  leo_lastimosa@abs-cbn.com