Arangkada for May 2, 2007

        TARANTAR NA SILA?

 

        Nangalisbo na ba gyod si Gobernador Gwen Garcia nga giprotestahan na mang paggamit sa iyang katungod pagpanalipod sa iyang kaugalingon?  Nganong nialsa mang mga magbubuhis sa iyang pag-awhag nga di lang kay did-an si Acting Deputy Ombudsman Virginia Palanca-Santiago pag-imbestigar sa mga pasangil sa kahiwian batok sa Kapitolyo kon dili ipaubos pa gyod og preventive suspension?

Uyon ko sa gipasabot ni Garcia nga managsama silang Santiago nga mga opisyal sa kagamhanan.   Apan angay sab siyang pasabton nga siyay nagtukod sa Cebu International Convention Center (CICC) ginamit ang buhis sa mga Sugbuanon, di si Santiago.   Siyay naglangay-langay pagtuman sa iyang gisaad nga subay sa dakong gasto, di si Santiago.

        Mao ni hinungdan nga siya karoy giimbestigar.  Ug si Santiago ang imbestigador.  Di makatugot ang mabuot nga mga Sugbuanon nga iyang gapuson si Santiago ug lawgawon ang imbestigasyon pinaagi sa pagpasaka og mga kasong way sukaranan.

-o0o-

        Nakapangutkot ko sa di katol sa pagtugkad sa sukaranan sa labing uwahing pag-ulbo ni Garcia tungod lang sa giingong sulti ni Santiago nga, "Nakabantay na sila."   Nganong giha'ngan man si Garcia?  Hadlok ba lang nga gilibak siyang Santiago atubangan sa mga sakop sa media?   O kumbinsido gyod nga gipasanginlan na siya nga nakahimo og krimen?

        Sa akong pag-ukay sa nagkalainlaing mga libro, ang mosunod maoy mga kahulogan sa "nakabantay":  Nakamatikod, nakadiparar, nakapindot, nakatimaho, nakasingo, nakatimbre, nakapaniktik, nakasabot, nakatugkad, naalerto, napugwat, nakalingi, nakakita, ug uban pang mas lagyo nang kahulogan.   Way bisan usa nga nagpasabot og krimen.  Bisan kinsang akong gipangutana wa modason nga ang "nakabantay" nagpasabot sab og nakakawat, nakailad, nakalusot, nakatikas, nakapahimus, nakapamintaha, nakapabor, o nahubog sa gahom.

        Sa pikas nga bahin, akong natino nga wa pay naka-apply og patent sa pung nga "sila" aron motumbok na lang nilang Garcia ug sa iyang pamilya.

-o0o-

        Klarong naklaro na nga way sukaranan ang pasangil nga gitunglo nang daan ni Santiago nga sad-an silang Garcia ug kaubanan sa gipasangil nga overpricing ug ubang mga anomaliya sa pagtukod sa CICC, tuguting mohisgot ko og labing menos duha ka kasayuran nga makapakumbinser nato nga way sukaranan ang mga pasangil nga nagpaggamit si Santiago sa mga politikong kaatbang ni Garcia:

·         Gawas ni kanhi mayor Teddy Ouano sa Mandaue nga alyado ni Garcia, gisuspenso sab ni Santiago tungod sa giingong overpricing sa deco lamps si kanhi mayor Arturo Radaza sa Lapulapu nga alyado sa kaatbang ni Garcia nga si kanhi senador John Osmena; ug

·         Usa ka adlaw sa wa pa gikutlo nga nagkanayon nga, "Nakabantay na sila," gibalibaran ni Santiago ang awhag ni Crisologo Saavedra nga dinaliang tigom uban nilang Garcia ug tanang mga kontraktor sa CICC kay wa pa silay sukaranan paghimo ini kay ila pang susihon ang mga dokumento nga gisumiter ni Saavedra.   [30]  leo_lastimosa@abs-cbn.com