Arangkada for May 3, 2007

        HINAOT MATUBAG

 

        Sukwahi sa iyang pahibawo sa mga sakop sa media. Wa kong kadawat og imbitasyon sa Kapitolyo alang sa tigom nga gipatawag ni Gobernador Gwen Garcia sa paghatag sa iyang gisaad ug gikahinaman nga subay sa dakong gasto sa Cebu International Convention Center (CICC).

Maong maneguro na lang kong daan pagpadangat pinaagi ning kabos nakong lindog sa mga pangutana nga ako gyod untang ipasupot, kon gitugotan pa lang nga makaatubang sa gobernadora human sa iyang pagdumili sa akong mga hangyo nga makighinabi niya atol sa akong tulomanong "Arangkada" sa DYAB Abante Bisaya, ug hinaot nga iyang tubagon uban sa pagbukas ngadto sa Sugbuanong mga magbubuhis sa tukmang mga dokumento:

-o0o-

·         Tinuod bang pangangkon ni Bise Gobernador Gregorio Sanchez nga niggahin ang Cebu Provincial Board og P515 milyones alang sa Cebu International Convention Center (CICC) pinasikad lang sa banabana sa buhatan sa gobernadora kay wa pay naumol nga plano alang sa proyekto?;

·         Tinuod bang pangangkon ni Sanchez nga gisugdan na nila pag-ugbok ang sub-structure sa CICC bisan wa pa mahuman ang plano alang sa super-structure (nga nakapahibung sa inilang mga inhinyero sa Sugbo nga naminaw sa tulomanon kinsa nipasabot nga kasagarang unahon ang plano sa super-structure kay unsaon man paghimo ang sub-structure kon wa pa mahibaw-i ang gibug-aton ug gidak-on sa ipatong nga super-structure)?;

-o0o-

·         Tinuod bang pangangkon ni Architect Manuel Guanzon nga bisan nahuman nang subasta sa mga transaksiyon sa CICC giawhag gihapon ni Garcia ang nidaog nga mga kontraktor pagpaubos sa ilang presyo (usa sa gitumbok ni Guanzon mao ang giingong pagkumbinser sa gobernadora sa WT Construction pagpaubos sa presyo sa tulo ka milyon ka kilo nga structural steel gikan sa P102 matag kilo ngadto sa P100 matag kilo) bisan kon gidili ni sa Government Procurement Act?;

·         Tinuod bang pangangkon ni Guanzon nga P12 milyones ray iyang nadawat sa P16.8 milyones nga kontrata sa iyang consultancy services?;

·         Nganong managsama mang mga presyo sa mga kontrata sa sub-structure ug super-structure hangtod sa kataposang usa ka dako (P59,611, 997.92) nga segun pa sa ubang mga kontraktor imposible man unta ning mahitabo?;

-o0o-

·         Nganong gibuakbuak man ngadto sa duha ka mga kontrata ang P307 milyones nga balor sa structural steel nga usa ra man untay supplier?;

·         Nganong ang WT Construction may nakakuha sa kontrata sa structural steel nga wa man igdungog si Willy Ty nga dunay steel mill o hardware?;

·         Nganong gibuakbuak man sa daghang kontrata ang yanong mga gimbuhaton sa landscaping (upat ka kontraktor), electrical works (upat ka kontraktor) ug painting works (tulo ka kontraktor)?; ug

·         Pila man gyoy kinatibuk-ang gasto sa pagtukod sa CICC ug tinuod bang daghan pang mga kontraktor ang wa kabayri kay way mga dokumento ang mga transaksiyon nga ilang nasudlan?   [30]  leo_lastimosa@abs-cbn.com