TINGOG UG GAHOM
Nisulbong pag-ayong gidaghanon sa mga nisuway pagpaminaw sa among DYAB Skypecast human sa akong gisuwat dinhi gahapon mahitungod sa bag-o namong eksperimento. Tuod man, sama sa ubang bag-ong mga teknolohiya, natakilpo dayon mi. Ang bag-ong Skypecast session nga among gihimo wa na mopakita sa mga ngan sa mga naminaw. Maong gawas nga wa na ming kaila sa among mga tigpaminaw, wa na sab ming kapawong sa ilang mga mikropono.
Kay usa sa default features sa Skype mao nga bukas dayon ang imong mikropono inig-apil nimo sa usa ka Skypecast. Maong ang among sibya nasagolan sa hilak sa mga bata ug dahunog sa mga sakyanan. Ang mga hingtungdan way kalibotan sama nga wa sab mi kahibawo diin gikan ang kasaba.
-o0o-
Mosurender na unta ko nga di gyod diay kasaligan ang bag-ong mga teknolohiya. Nga ang ilang saad sa kasayon di gyod makalahutay. Hangtod nga gipasabot ko ni Lidoy sa Apas, nga usa sa niapil sa eksperimento, nga mapaabot gyod ang mga bulilyaso kay beta pa man ang Skypecast. Nipasidaan siya nga kon monindot na pag-ayong Skypecast di na sab ni libre.
Nahupay og dyutay ang akong kahingawa, nga tingalig nabantayan na sa Skype ang among pagkabayo sa ilang teknolohiya ug gisugdan na mig higpit, dihang ang sunod nga sesyon nga among gibuksan nagpakita na sa naandan nga lista sa ngan sa mga naminaw ug, labaw sa tanan, nibanhaw na sa among gahom pagpawong sa ilang mga mikropono. Nahibalik na sang lunsay namong signal sa Internet.
-o0o-
Si Lidoy nangagpas nang daan nga dako kaayong papel nga huptan sa Skypecast sa umaabot nga piniliay sa 2010. Kon mahinayon. Kay ang mga politiko makapatuyang paghimo og Skypecasts sa ilang kampanya pagkumbinser sa batan-ong mga botante, nga maoy labing suhito ug madasigon nga mga konsumidor sa Internet, pagbotar nila.
Mahimong mahitabo na. Apan akong giingnan si Lidoy ug lain namong kapamilya nga nag-alyas og Tetanous nga sa di pa mailog sa mga politiko mas maayong gamiton sa katawhan ang bag-ong mga teknolohiya pagpugos sa mga politiko, sukwahi sa ilang naandan, pagpaminaw sa Haring Lungsod.
-o0o-
Gamhanan gyod tinuod nga kahimanan ang Skypecast paghatag pagbalik og tingog ngadto sa katawhan. Kay lahi sa naandan nga one-way nga audio streaming, ang Skypecast epektibo sang kahimanan paghatag og tingog sa mga tigpaminaw. Makahimo sila pagsagbat, pagtampo, pagsukwahi, pagsugyot og bag-ong hilisgutanan ug paghisgot sa mga nataligam-an sa mga magsisibya.
Mao ni sunod namong tahas. Ang paghatag og higayon sa among mga tigpaminaw, bisan asang bahina sa kalibotan ug ang-ang sa katilingban sila nahimutang, sa pagtingog. Mahimong managana una sila sa sinugdanan. Apan hinaot nga human sila makabati sa ilang tingog makaplagan nila pagbalik ang ilang gahom. Ug kaisog pagpatigbabaw sa ilang kaligdong. [30] leo_lastimosa@abs-cbn.com
No comments:
Post a Comment