Arangkada of Leo Lastimosa for August 3, 2008

          1,600 KA BAYANI

 

          Ambot unsay nahitabo:  Mas daghan na ba lang kahang Sugbuanon ang nakaamgo sa kadinalian sa panginahanglan paghatag og dugo?; o mas daghan na ba lang kaha nilang nakabuntog na sa ilang kahadlok pagpakuha og dugo?; o mas daghan na ba lang gyod kaha ang nakatugkad sa kadako sa ilang matabang ug sa kadaghan sa kinabuhi nga ilang maluwas kon mopaula sila sa ilang dugo?

          Bisan unsa pay hinungdan, malipayon kong motaho ninyo nga nalabwan ang tanan namong pangandoy ug banabana sa gidaghanon sa bayanihong mga Sugbuanon nga nagpanon sa walo ka buwag nga mga dapit nga gipahigayonan sa dinungan nga "Halad sa Kinabuhi," ang pinalapdan nga Kapamilya Blood Donation Campaign sa ABS-CBN Cebu.

-o0o-

          Sa akong pagsuwat ini, dayong tak-op sa nagkalainlaing venues sa tibuok adlaw namong kalihokan, 1,412 na ka blood donors ang nakahatag og dugo:

·        317 ang nakahatag og dugo sa EMall Parking Area pinaagi sa Cebu City Medical Center (CCMC);

·        255 ang nakahatag og dugo sa Gaisanon Grand Fiesta Mall pinaagi sa Philippine National Red Cross (PNRC);

·        241 ang nakahatag og dugo sa SM City pinaagi sa Regional Blood Coordinating Council (RBCC);

·        150 ang nakahatag og dugo sa Mandaue City Hall Grounds pinaagi sa Mandaue City District Hospital, Cortes Gen. Hospital ug Regional Blood Center (RBC);

·        134 ang nakahatag og dugo sa Chong Hua Hospital;

·        123 ang nakahatag og dugo sa Marina Mall pinaagi sa RBC;

·        102 ang nakahatag og dugo sa Cebu Doctors University Hospital; ug

·        90 ang nakahatag og dugo sa Perpetual Succor Hospital.

-o0o-

          Mas daghan pa gyod unta ang matigom nga dugo kon nakahatag pa ang tanang nagbudlay pagpila sa nagkalainlaing venues.  Kapin sa 200 nila ang nabalibaran kay ubos og hemoglobin, kuwang og tug, way pamahaw o paniudto, nakainom og bino sa niaging gabii, taas ang presyon sa dugo, wa pay tuig nga nagpapatik o nagpatusok sa dunggan o nagpaibot sa ngipon ug uban pang mga hinungdan.

          Sa labing unang higayon sa kasaysayan sa napu ka tuig na namong blood donation campaign, nahutdan sa blood bags ang PNRC sa Tabunok ug RBC sa Mandaue ug Lapulapu.  Maong napugos sila pagbalibad sa mga nagpila nga mohatag unta og dugo.

-o0o-

          Daghang salamat sa tanang nangawas sa ilang mga pinuy-anan, nananghid sa ilang mga trabahoan ug mga eskuylahan ug nakigkuyog sa ilang mga pamilya ug kaubanan ug kahigalaan aron paghatag sa gasa sa kinabuhi.  Ang matag bag sa dugo mahimong makaluwas og hangtod sa tulo ka kinabuhi.

          Sa ato pa, kapin sa upat ka libo ka kinabuhi (4,236 ang labing tukma nga ihap) ang maluwas tungod sa inyong sakripisyo.  Kamo ang tinuod nga mga bayani!  [30]  leo_lastimosa@abs-cbn.com