Arangkada for September 5, 2008

            SA NGAN SA ANAK

 

            Makaluluoy?  O mirisi?

            Si Talisay City Mayor Soc Fernandez nagkapuliki pagpanagang sa sibaw nga pagsaway sa mga binuhatan sa iyang anak.  Iyang mga dumadapig nitataw nga di makiangayon nga iduhig ang mayor sa mga krimen nga gipasangil batok ni Joavan.  Apan ang nagpakabana nga mga Talisaynon nagtuo nga ang way kinutobang pagdupadupa ni Mayor Soc nakahimo niyang tigpanalipod sa gipasanginlang kriminal sa ilang dakbayan.

            Sa iyang unang katuigan sa politika, si Mayor Soc gihulagway sa iyang mga kaatbang nga gitahud ug gihangad pag-ayo sa katawhan nga way bisan unsang isyu, bisan unsa kamatinud-anon ug kamakiangayon nga makadut batok niya.  Tungod ni Joavan, ang mayor mahimong di na sama kakublan.

-o0o-

            Sud sa dugayng panahon, salamat sa iyang lantip ug manggialamon nga pagpanalipod sa Simbahang Katoliko, o sa kakuwang og katakos sa iyang mga kaatbang pag-ambas sa iyang kalamposan pagkumbinser sa katawhan, si Mayor Soc gituohan sa kasagaran sa iyang mga pangangkon ug gipalingkawas gikan sa bisan unsang mga pasangil.

            Usa sa iyang mga kanhi kaatbang, nga patay na karon, nipasangil nga si Mayor Soc dunay anak sa gawas.  Nga lahi si Joavan tinuod gyong dugo sa iyang dugo.  Apan gipanamkon sa babaye nga di niya asawa nga gitumbok nga nagpuyo sa amihanang Sugbo.  Ang kaatbang nangangkon nga dunay dokumento pagmatuod sa pasangil.  Apan ang mga botante sa Talisay wa maminaw niya.

-o0o-

            Ang sinultihan ni Mayor Soc wa mausab.  Larino gihapong mokutlo sa bibliya.  Bisan sa dakong gahom, nagpabilin siyang mapaubsanon.  Ug manggiluy-on bisan sa labing kabos nga mga molupyo.  Gawas lang sa mga nangangkon nga biktima sa pagpanghasi, pagpangulata ug pagpamusil ni Joavan.

            Apan inanay nang nabantang ang nagkadako nga kang-a sa iyang sinultihan ug binuhatan.  Usa sa mga atraso sa mga politiko nga lisod  mapasaylo sa katawhan mao ang pagpaka-aron-ingnon.  Abunda ang mga ebidensiya sa iyang paglikoy.

-o0o-

            Kon sama nako magdadayeg ka ni Mayor Soc, basaha ni ug hilak:

·        Siyay labing gamhanan ug katuohan nga tigkampanya pagpanalipod ug pagpalambo sa moralidad apan wa siya pangilogi ni kabadlong ni Joavan nga nakigpuyo nga way kasal-kasal sa babaye nga iya nang gipaangkan og katulo;

·        Mora lang og wa ni Mayor Soc nga nasakpan si Joavan nga nakig-date og 24 oras sa babaye nga gawas nga di iyang kapuyo, gipasud pa gyod niya og trabaho sa Talisay City Hall;

·        Wa gyod siya mauwaw, o bisan maikog na lang, sa di na maihap nga mga higayon nga nasakpan si Joavan nga nagamit sa ambulansiya, pump boat ug ubang mga sakyanan sa kagamhanan alang sa personal nga katuyoan; ug

• Wa gyod siya maalarma, o bisan mabalaka na lang, sa nagkataas nga listahan sa pagpanghulga, pagpangulata, pagpangawat, pagpangilkil ug pagpamusil nga pulos gipasangil batok sa iyang pinanggang sinagop.  [30]  leo_lastimosa@abs-cbn.com