Arangkada for April 18, 2007

        POSAS SI GWEN?

 

        Unsa may imong buhaton kon mag-abot sa imong atubangan silang Architect Manuel Guanzon, ang nagpailang usa sa labing maayong arkitekto sa atong nasud, ug si Crisologo Saavedra, ang usa sa labing mabulukon nga whistleblowers sa atong panahon?   Pasagdan nimo sila ug hatagan sa tanang higayon nga magkabayloay sa ilang mga panghunahuna mahitungod sa usa sa labing kontrobersiyal nga proyekto sa niaging 12^th Asean Summit, ang Cebu International Convention Center (CICC).

        Nga maoy akong gihimo gihimo dihang nag-abot silang Guanzon ug Saavedra sa "Arangkada" sa DYAB Abante Bisaya gahapon sa buntag.  Nanawag namo sa telepono si Saavedra (tungod sa mga hulga batok sa iyang kinabuhi human nasuspenso ang mga opisyal nga gilambigit sa giingong overpricing sa decorative ug street lamps, wa na siya mokumpiyansa sa among sibyaanan).   Ug among gitawgan ug nisugot nga makig-istorya ni Saavedra si Guanzon.

Wa ko masayop.   Tungod sa ilang panag-abot, daghang nahibaw-an ang Sugbuanong mga magbubuhis sa hangtod karon tinagoang mga transaksiyon sa dugay nang nahuman nga CICC.

-o0o-

        Gihagit ni Guanzon si Saavedra sa pagpanalipod sa iyang banabana nga P17,000 ray naggasto sa matag usa sa 27,000 square meters nga floor area sa CICC.  Nipasangil siya nga iresponsable ang gihimo ni Saavedra kay wa siyang kakita sa plano ug wa apila pagkuwenta ang elevator, escalator ug ubang modernong kahimanan sa CICC.

        Si Saavedra nibarug sa iyang subay.  Matod niya ang P515 milyones nga gahin sa Kapitolyo nagpasabot nga P19,000 ang naggasto sa matag metro cuadrado sa CICC.   Kon tinuoray ang Kapitolyo nga nanalipod sa interes sa mga Sugbuanon, matod ni Saavedra, P17,000 matag metro cuadrado ra unta ang gitanyag nga floor price.

        Apan si Guanzon niingon nga mas dako kay sa P515 milyones nga gahin sa Cebu Provincial Board ang aktuwal nga gasto sa CICC.  Gani, kon pasikaran ang iyang orihinal nga desinyo, kinahanglang moggasto ang Kapitolyo og P28,000 matag metro cuadrado, o P756 milyones sa kinatibuk-ang proyekto.

-o0o-

        Apan ang labing mahinungdanong argumento ni Saavedra wa magsentro sa presyo.  Matod niya ilegal ang gihimo ni Gobernador Gwen Garcia sa pagpikas-pikas sa mga transaksiyon pagtukod sa CICC ngadto sa buwag ug nagkalainlaing mga kontrata.   Gibisto ni Saavedra nga gawas sa pagtukod sa super structure, nga gigahinan lang og P100 milyones, sabutsabot na lay gipasikaran ni Garcia sa paghatag sa nahibiling kapin sa P400 milyones nga mga kontrata.

        Nga giangkon ni Guanzon.  Matod niya siyam ka mga kontraktor ang nagtinabangay sa paghuman sa CICC.  Giangkon sab niya nga nanghilabot si Garcia sa sangpotanan sa mga subasta aron makabarato pa gyod sa nidaog nga mga kontraktor.  

Gipasidunggan ni Guanzon si Garcia nga bayani.   Apan nipasidaan si Saavedra nga ang kasayuran nga gibutyag ni Guanzon mosangpot sa pagposas sa gobernadora.  [30[   leo_lastimosa@abs-cbn.com